प्रदेश १ सरकारको पहिलो संरचना निर्माण

विराटनगर– प्रदेश १ सरकार प्रदेशसभा भवन निर्माण गरेको छ। प्रदेशसभाले झण्डै दुई तिहाइ समय बिताएपछि नयाँ भवन निर्माण गरेको हो। शिलान्यास भएको एक वर्षपछि प्रदेश सभा भवन निर्माण भएको छ। प्रदेश सभा भवनको मुख्यमन्त्री भीमप्रसाद आचार्यले उद्घाटन गरे। 

गत वर्ष असोज १ गते शिलान्यास गरेको भवन सुनसरी धरानको स्वामी नारायण निर्माण सेवाले निर्माण गरेको हो। निर्माण सेवाले भ्याटबाहेक २ करोड ५९ लाख २० हजार ९५६ रुपैयाँमा निर्माण सम्पन्न गरेको प्रदेशसभा सचिव गोपालप्रसाद पराजुलीले बताए।

उनका अनुसार प्रदेशसभा भवन अन्य खर्चतर्फ १६ लाख ४३ हजार ३७० को फर्निचर, १६ लाख ७७ हजार ११७ को साउन्ड सिस्टमा र १७ लाख ७६ हजार ९२५ रुपैयाँ आन्तरिक सजावटमा खर्च भएको छ। प्रदेशसभाका ८ वटा अधिवेशन जिल्ला समन्वय समितिको सभाहलबाट सञ्चालन गरिएको छ। संसदको नवौं अधिवेशन असोज २२ गतेदेखि सुरु हुँदैछ। सो अधिवेशन नयाँ भवनमा सञ्चालन हुने प्रदेशसभा सचिव पराजुलीले बताए। प्रदेश सभामा ११० वटा माइक जडित कुर्सी टेबल राखिएको छ।