माइत हिँडेकी रामकलीको डोजरको ठक्करबाट मृत्यु भएको प्रहरीको निष्कर्ष

सुर्खेत- सल्यानमा माइती जान हिँडेकी रामकली खत्रीको डोजर (जेसीवी) को ठक्करबाट मृत्यु भएको प्रहरीले निष्कर्ष निकालेको छ। ‘चालकले अध्याँरो भएका कारण घटना भएको बयान दिएका छन्,’ सल्यानका डीएसपी गोविन्द थापाले भने, ‘घटनास्थलको प्रकृति, शवको अवस्था र प्रारम्भिक बयानले डोजरकै ठक्करबाट रामकलीको मृत्यु भएको देखिन्छ।’

घटना भएको दिन डोजर चालक डाँगीले मदिरासमेत सेवन गरेको खुलेको छ। ‘मदिरा सेवन गरेको थिएँ घटना कसरी भयो, थाहा छैन भनेका छन्,’डीएसपी थापाले भने, ‘घटना स्वीकार त गरिसकेका छैनन् तर अनुसन्धानले डोजरकै ठक्करबाट मृत्यु भएको देखाउँछ।’ मृतक रामकलीको टाउकोमा फुटेको छ भने एउटा हात र खुट्टा किचिएको छ।

दुई दिनसम्म गरिएको अनुसन्धान र चालकको बयानका आधार डोजरकै ठक्करबाट रामकलीको मृत्यु भएको प्रहरीको निष्कर्ष छ। 

बागचौर नगरपालिका-२ गैरीकी ५४ वर्षीया रामकली आइतबार मृत अवस्थामा भेटिएकी थिइन्। गत शनिबार उनी सोही वडामा रहेको माइती ज्यूला जान भनेर घरबाट हिँडेकी थिइन्। तर माइती पुग्‍न नपाउँदै घरदेखि दुई किलोमिटर (ठाँटीचौर भन्‍ने स्थानमा) आइतबार बिहान उनको शव भेटिएको थियो।

घटना शंकास्पद देखिएपछि प्रहरीले नेपालगञ्‍जबाट तालिम प्राप्त कुकुर झिकाएर अनुसन्धान थालेको थियो। दुई दिनसम्म गरिएको अनुसन्धान र चालकको बयानका आधार डोजरकै ठक्करबाट रामकलीको मृत्यु भएको प्रहरीको निष्कर्ष छ। 

तालिम प्राप्त कुकुर र घटना भएकै दिन डोजर उक्त सडक खण्डमा मर्मत गरेको भेटिएपछि प्रहरीले जोडर चालक, सहचालक र डोजर मालिकलाई पक्राउ गरी अनुसन्धान गरेको थियो। अनुसन्धानपछि प्रहरीले बागचौर ३ का २६ वर्षीय डोजर चालक विष्णु डाँगी नै दोषी रहेको निष्कर्ष निकालेको छ। सहचालक र डोजर मालिकलाई आवश्यक परे बोलाउने सर्तमा छोडिदिएको छ। जोडर चालकलाई भने आज नै म्याद थप गरेर अनुसन्धान प्रक्रिया अगाडि बढाएको प्रहरीले छ।