कांग्रेसमा कसैलाई काखा र कसैलाई पाखा गरिन्न : रमेश लेखक

कञ्चनपुर- नेपाली कांग्रेसका केन्द्रीय सदस्य रमेश लेखकले कुनै पनि कार्यकर्तालाई काखा वा पाखा नगरिने बताएका छन्। कञ्चनपुर निर्वाचन क्षेत्र नम्बर ३ को दोधरा-चाँदनी नगरपालिकामा विभिन्न पार्टी परित्याग गरी नेपाली कांग्रेस प्रवेश गराउँदै उनले यस्तो बताएका हुन्। 

'नेपाली कांग्रेसमा कुनै पनि कार्यकर्तालाई काखा र पाखा गरिन्न। नवप्रवेशीहरुलेहरू पनि यसको कुनै महसुस गर्नुपर्ने छैन,' नेता लेखकले भने, 'म नवप्रवेशीलाई पनि सम्मानजनक हिसाबले क्षमताअनुसार जिम्मेवारी दिने प्रतिबद्धता गर्छु।'

नेपाली कांग्रेस दोधरा-चादनी नगर समितिद्वारा आयोजित शुभकामना आदानप्रदान तथा नवप्रवेशीलाई स्वागत कार्यक्रममा नेता लेखकले नवप्रवेशीलाई कांग्रेसको साधारण सदस्यता प्रदान गरी स्वागत गरेका थिए।

विकास र समृद्धि ल्याउन सक्ने क्षमता नेपाली कांग्रेसले राख्ने तर कम्युनिस्टलगायतका पार्टीले भ्रम र झुठको खेती मात्र गर्ने भएकाले नेपाली कांग्रेसमा आएको नवप्रवेशीहरूको भनाइ छ। 

कार्यक्रममा नेकपा एमाले, माओवादी र राप्रपा परित्याग गरी करिब ३ सय जना नेपाली कांग्रेस प्रवेश गरेको कांग्रेसको दाबी छ।