अर्गानिक चिया उद्यमी राईको निधन

विराटनगर– कोरोना संक्रमणका कारण अर्गानिक चिया उद्यमी मोरङको केराबारी-२ सिंहदेवीका ५५ वर्षीय नारायणप्रसाद राईको मृत्यु भएको छ। 

न्युरो अस्पताल विराटनगरमा उपचारका क्रममा उनको बिहीबार साँझ मृत्यु भएको हो। राईलाई केही समय अगाडि कोरोना संक्रमण भएको थियो।

राईले २०५६ सालमा उत्तरी मोरङमै पहिलोपटक मातृभूमि टि–स्टेट प्रालिमार्फत अर्गानिक चिया खेती सुरु गरेका थिए। उनले अर्गानिक चिया उत्पादन गर्ने, आफै प्रशोधन गर्ने र विदेश निर्यात गर्दै आएका थिए। 

भारत, चीन, युरोप, अमेरिका लगायतका देशहरूमा राईको चिया निर्यात हुने गरेको थियो। सडक, बिजुली र सिंचाई नभएको सिंहदेवीमा राईले ५० रोपनीमा चिया खेती सुरु गरेर २५० रोपनीमा विस्तार गरेका थिए। उनको मातृभूमि टि–स्टेट कम्पनीमै प्रशोधन गरी वार्षिक ५ हजार किलो ग्रिन टि उत्पादन गर्दै आएका थिए। चिया कम्पनीमा स्थानीय ५० जनाले रोजगार पाएका छन्। 

राईले जिल्ला कृषि विकास कार्यालय मोरङबाट २०७१ सालमा राष्ट्रपति उत्कृष्ट कृषक पुरस्कार पाएका थिए। २०७२ मा विराटनगरमा भएको नवौँ प्रांगारिक कृषि मेलामा समेत प्रथम भएका उनी २०७३ सालमा विराटनगरमै भएको खाद्य मेलामा उनको उत्पादनले प्रथम स्थानमा रहेको थियो। 

राईको निधनले उत्तरी मोरङमा अपूरणीय क्षति भएको मोरङ क्षेत्र नम्बर १ का सांसद घनश्याम खतिवडाले बताए। सिंहदेवी जेफाले पर्यटन क्षेत्रमा चिया बगान निर्माण गरेर सम्भावनाको चेतना छर्ने व्यक्ति  गुमाउनु परेको उनले बताए।