विराटनगरमा १८ देशका मनोचिकित्सक भेला हुँदै

विराटनगर- विराटनगरमा डेढ दर्जन बढी देशका मनोचिकित्सक भेला हुने भएका छन्। नेपाल मनोचिकित्सक संघको आयोजनामा आगामी कात्तिक ११ देखि १३ गतेसम्म विराटनगरमा हुने मनोचिकित्सको राष्ट्रिय सम्मेलनमा १८ देशका मनोचिकित्सक भेला हुने सम्मेलन आयोजक समितिका प्रवक्ता डा. प्रभात चालिसेले बताए।

मानसिक रोगका कारण स्वास्थ्यमा आउने चुनौती र त्यसको निदान र उपचार सेवालाई थप प्रभावकारी वनाउन मनोचिकित्सकहरुको राष्ट्रिय सम्मेलन विराटनगरमा गर्न लागिएको डा. चालिसेले बताए।

विराटनगरमा बिहीबार आयोजित पत्रकार सम्मेलनमा डा. चालिसेले उच्चतम आधुनिक तथा वैज्ञानिक ज्ञान र सिप आर्जनगरि मानसिक रोगीलाई छिटो‍छरितो रुपमा सेवा पुर्‍याउनु सम्मेलनको मुख्य उद्देश्य रहेको बताए।

सम्मेलनमा सहभागी चिकित्सकबीच मानसिक स्वास्थ्यमा बहुपक्षीय साझेदारी तथा मानसिक स्वास्थ्यमा देखिने चुनौती र अवसरका विषयमा छलफल हुने आयोजक समितिका संयोजक प्रा.डा. नवराज कोइरालाले बताए।

सम्मेलनमा ३२ वटा कार्यपत्र प्रस्तुत हुनुका साथै मानसिक स्वाथ्यमा पत्रकारिताका विषयमा पत्रकारसँग तथा  मानसिक स्वास्थ्यका विषयमा बनाइने नीति निर्माणमा कानुन विज्ञसँग छलफल हुने प्रा.डा. कोइरालाले बताए।