चितवनलाई जिताएपछि राजेशले भने– धैर्य गरेरै राम्रो खेल्न सकिने रहेछ

काठमाडौं– कीर्तिपुरस्थित त्रिभुवन विश्वविद्यालयको मैदानमा बिहीबार दिउँसो सम्पन्न खेलमा राजेश पुलामी र कमल सिंह ऐरीले उत्कृष्ट फिनिसिङ गरेपछि चितवन टाइगर्सले ३ विकेटको जित निकालेको छ। आजको खेलमा चितवनले काठमाडौंलाई हराएको हो। 

ऐरी र पुलामीले ४७ रनको साझेदारी गर्दै ९५ रनमा ७ विकेट गुमाएको अवस्थाबाट चितवनलाई पुनरागमन गराएका थिए। त्यसअघि कप्तान सोमपाल कामी शून्य र सेकुगे प्रशन्न ५ रनमा आउट भएका थिए। सो क्रममा कमल सिंह ऐरीले २३ र राजेश पुलामीले २६ बनाए। ऐरी र पुलामी अविजित रहे।

‘मलाई टिमले जे जिम्मेवारी दिएको छ मैले त्यो पूरा गर्नुपर्छ। अब ठूलो लक्ष्य हुँदा अर्को तरिकाले खेल्नुपर्छ। आज १४२ रनको लक्ष्य थियो। मलाई थाहा थियो कि एक दुई पटक मात्र ब्याटमा बल लाग्यो भने खेल आफ्नो हातमा आउनेछ,’ राजेश पुलामीले खेलपछि भने। 

उनले पछिल्लो खेलमा पनि उत्कृष्ट प्रदर्शन गर्दै चितवनलाई जित दिलाएका थिए। विराटनगरविरुद्ध ३९ बलमा ४३ रन बनाएर अविजित रहेका थिए। सो खेलमा उनले दुई छक्का र दुई चौका समेत प्रहार गरेका थिए। ‘पछिल्लो खेलमा राम्रो प्रदर्शन गरेपछि मलाई आत्मविश्वास आएको थियो। पहिले म एक–दुई वटा डट खानेबित्तिकै हिटमा जान्थैँ। आजभोलि त्यसरी खेल्दिनँ। धैर्य गरेर खेल्यो भने राम्रो हुने रहेछ,’ उनले भने, ’अहिले टिमले फिनिसिङको जिम्मेवारी भएकाले त्यसरी खेलिरहेको छु। प्रदर्शन राम्रो हुने नै धैर्यताले रहेछ।’

उनले चितवनको लक्ष्य प्लेअफमा पुग्नु रहेको बताएका छन्। उनले आउने दिनमा पनि उत्कृष्ट प्रदर्शन गर्ने बताएका छन्। उनले अन्तिममा परेको बेलामा नआत्तिने र राम्रो गरेको बेलामा नआत्तिकन खेल्ने बताएका छन्।