क्यानका सचिव र उपाध्यक्षद्वारा राजीनामा

काठमाडौं- नेपाल क्रिकेट संघ (क्यान)का सचिव अशोकनाथ प्याकुरेल र उपाध्यक्ष राजुबाबु श्रेष्ठले पदबाट राजीनामा दिएका छन्। बुधबार काठमाडौंमा पत्रकार सम्मेलन गर्दै सचिव प्याकुरेल र उपाध्यक्ष श्रेष्ठले राजीनामाको घोषणा गरेका हुन्।

क्यानलाई स्थापित गर्न आफू नेतृत्वमा आएको र त्यसमा सफल भएपछि पुरानो योजना अनुसार राजीनामा दिएको प्याकुरेलले बताए। 'आईसीसीबाट निलम्बनबाट पूर्ण फुकुवा भएपछि राजीनामा दिन सोचेको थिएँ,' उनले भने, 'अलि ढिला भएको हो। यो हाम्रो पहिलेकै योजना हो।' 

अन्तराष्ट्रिय क्रिकेट परिषद (आईसीसी)ले गठन गरेको स्वतन्त्र कमिटीको समन्वयमा २०७६ सालको असोज ११ गतेको निर्वाचनबाट प्याकुरेल सचिवमा निर्वाचित भएका थिए।

प्याकुरेल चतुरबहादुर चन्दको प्यानलबाट प्रत्यासी विनोद कुमार मैनालीलाई हराएर सचिवमा निर्वाचित भएका थिए। यस्तै श्रेष्ठ पनि चन्द प्यानलबाट मिङ्मा डाण्डु शेर्पालाई हराएर उपाध्यक्षमा निर्वाचित भएका थिए।

क्यानमा नयाँ नेतृत्व आएपछि २०७६ को असोज २७ गते आईसीसीले तीन वर्षपछि क्यानको निलम्बन सशर्त फुकुवा गरेको थियो। अवैधानिक चुनावको कारण देखाउँदै आईसीसीले क्यानलाई निलम्बन गरेको थियो। 

राजीनामा दिएका दुवै जनाको सम्बन्ध अध्यक्ष चन्दसँग बिग्रिएको चर्चा हुन थालेको थियो।