विराटनगर महानगरका अपांगता भएका व्यक्तिहरुको स्वास्थ्य परीक्षण गरिने

विराटनगर- विराटनगर महानगरपालिका क्षेत्रका करिब एक हजार अपांगता भएका व्यक्तिहरुको स्वास्थ्य नि:शुल्क स्वास्थ्य परीक्षण गरिने भएको छ।

अपांगता रोकथाम तथा पुर्नस्थापना कार्यक्रम अन्तर्गत मंगलबारदेखि सुरु भएको स्वास्थ्य शिविर आगामी असोज २० गतेसम्म सञ्‍चालन हुने विराटनगर महानगरपालिकाले जनाएको छ। विराटनगरका नौवटा वडामा आठ दिनसम्म सञ्‍चालन हुने शिविरमा ९९९ जना अपाङ्गता भएका व्यक्तिहरुको स्वास्थ्य परीक्षण गरिने लक्ष्य रहेको विराटनगर महानगरपालिका सामाजिक विकास महाशाखा प्रमुख सरोज गौतमले जानकारी  दिए।

प्रदेश १ सरकार सामाजिक विकास मन्त्रालय, विराटनगर महानगरपालिका र करुणा फाउण्डेशन प्रदेश १ को आयोजनामा स्वास्थ्य परीक्षण शिविर सुरु भएको हो। अपांगता भएका व्यक्ति तथा बालबालिकाहरुलाई परिचयपत्र वितरण गर्ने, अपांगता भएका व्यक्तिहरुको अवस्था पहिचान गरी फिजियोथेरापी, जिविकोपार्जनका लागि सिपमुलक कार्यक्रम गर्ने र अपांगता भएका बालबालिकाहरुलाई शिक्षामा पहुँच उपलब्धता गराउने उद्देश्यले शिविर सुरु गरिएको गौतमले बताए।

 विराटनगरको वडा नम्बर २ वाट शिविर सुरु गरिएको छ। मंगलबार करिब ५८ जनाको स्वास्थ्य परीक्षण गरिएको करुणा फाउण्डेसन नेपाल प्रदेश १ का कार्यक्रम अधिकृत राजिवकुमार चौधरीले बताए। स्वास्थ्य शिविरमा गरिएको स्वास्थ्य परीक्षणका आधारमा व्हिल चेयर, सेतो छडी, बैशाखी, सुनाइ यन्त्र, चश्‍मा, कृतिम हातखुट्टा, औंला, फिजियोथेरापी सेवा र थप उपचारका लागि अस्पताल रेफर गरिने चौधरीले बताए।