सिटीविरुद्ध पहिलो जितको खोजीमा पीएसजी

काठमाडौं – युरोपेली च्याम्पियन्स लिगमा आज मंगलबार राति पौने १ बजे उपाधि दावेदार म्यानचेस्टर सिटी र पेरिस सेन्ट जर्मेन (पीएसजी)ले पहिलो लेगको खेल खेल्दैछन्।

पीएसजीको मैदानमा हुने खेलमा दुवै टिम जितको लक्ष्यका साथ मैदान उत्रने छन्। फ्रेन्च क्लब पीएसजीले अहिलेसम्म इंग्लिस क्लब म्यानचेस्टर सिटीलाई हराउन सकेको छैन।

पछिल्लो पाँच भेटमा पीएसजीले तीन हार बेहोरेको छ भने दुई खेल बराबरी भएका छन्। उसले यसअघि युभेन्टससँग मात्र सिटीभन्दा धेरै (आठ पटक) जितविहीन यात्रा गरेको छ। त्यसैले आज पीएसजीका प्रशिक्षक माउरिसियो पोचेतिनोलाई सिटीविरुद्ध जित निकाल्नैपर्ने दबाब छ।

यता पीएसजी इंग्ल्यान्डका विभिन्न क्लबसँगको पछिल्लो तीन खेलमा घरेलु मैदानमा पराजित भएको छ। पछिल्लो सिजनको नकआउटमा पनि उसले सिटीसँग नै हार बेहोरेको हो।

यता अन्तिम १० अवे खेलमा सिटी भने अपराजित छ। त्यस्तै, उसले २०१७ यता विदेशमा भएको अवे खेल हारेको छैन।