गाउँमा चुन खानी छ, जनप्रतिनिधि भन्छन्- हामीलाई थाहै छैन

धनगढी- कैलालीको पूर्वपश्चिम राजमार्गसँगै रहेको बर्दगोरीया गाउँपालिकामा प्रशस्त मात्रा चुन खानी रहेको स्थानीयको दाबी छ। 

स्थानीयका अनुसार गाउँपालिकाको वडा नम्बर-२ छोट्की पिरुवा क्षेत्र र बर्दगोरीया धामको खोचमा प्रशस्त मात्रामा चुन खानी रहेको छ। 

तत्कालीन दोदोधारा गाउँ विकास समितिका प्रधानपञ्चसमेत रहेका स्थानीय उपेन्द्र बमले बि. स. २०४१ सालदेखी लगातार तीन वर्ष सो क्षेत्रको चुन खानीबाट चुन उत्खनन् तथा प्रशोधन गरिएको बताए। त्यो बेला स्थानीय भक्तबहादुर बमले छोट्की पिरुवामा भट्टा लगाएर चुन खानी उत्खनन तथा प्रशोधन गरेको उनले जानकारी दिए। बमले भने, ‘प्रविधिको अभाव र बजारको प्रतिस्पर्धाका कारण धेरै समय भट्टा चल्न सकेन।’

सरकारले यो विषयलाई गम्भीरता पूर्वक लिई सरोकारवालाहरूसँग समन्वय र सहकार्य गर्दै चुन प्रशोधन गर्न सके पालिकाको प्रमुख आयस्रोत बन्ने बलियो सम्भावना रहेको उनको भनाइ छ।

तर, बर्दगोरीया गाउँपालिकाका अध्यक्ष बलिराम डगौरा थारुले भने सो विषयमा आफू जानकार नभएको बताए। हाम्रो पालिकामा चुन खानी छ र? अध्यक्ष डगौरा थारुले भने, ‘मलाई त अहिलेसम्म कसैले भनेन्। यो कुराको जानकारी मैले तपाईबाट पाउँदै छु,’ उनले भने। चुन खानीको बारेमा थाहा पाएको भए पहिले नै सरोकारवालासँग छलफल गरेर प्रशोधनको प्रकृया अगाडि बढाइसक्नेको हुने उनले बताए।

तत्कालीन दोदोधारा गाउँ विकास समितिका प्रधानपञ्चसमेत रहेका स्थानीय उपेन्द्र बमले बि. स. २०४१ सालदेखी लगातार तीन वर्ष सो क्षेत्रको चुन खानीबाट चुन उत्खनन् तथा प्रशोधन गरिएको बताए।

सोही वडाका अध्यक्ष भेखु चौधरीले चुन खानीबारे हल्ला सुनेको भए पनि सो बिषयमा जानकार नभएको बताए। उता बम भने चुन खानीबारे अध्ययन गरेर उत्खनन गर्न सके गाउँपालिकाको आयश्रोतमा बृद्धि हुनुका साथै स्थानीयले रोजगारी पाउने बताउँछन्। उनले यसबारेमा जनप्रतिनिधि बेखवर हुनु दुखको कुरा भएको प्रतिक्रिया दिए।

तीन वर्ष सो क्षेत्रबाट चुन उत्खनन तथा प्रशोधन गरिसकियकाले जनप्रतिनिधि बेवर हुनु र प्रदेश सरकारले कुनै चासो नदेखाउनुले आफूहरूलाई दुखी तुल्याएको भक्तबहादुर बमले बताए। उनले तीन वर्षसम्म चुन उत्खनन् गरिएको गाउँकै खानीबारे स्थानीय जनप्रतिनिधिले कुनै जानकारी छैन भन्नु थाहा पाएर पनि थाहा नपाए झै गरेको प्रतिक्रिया दिए।