राष्ट्रियसभा सदस्य दाहाल भन्छन्- सत्ताको दुरुपयोग गरेर अदालतलाई प्रभावित पार्न खोजियो

काठमाडौं- राष्ट्रियसभा सदस्य देवेन्द्र दाहालले शेरबहादुर देउवा नेतृत्वको सरकारले सत्ताको दुरुपयोग गरेर अदालतलाई प्रभावित पार्न खोजेको आरोप लगाएका छन्।

राष्ट्रियसभा बैठकको विशेष समयमा बोल्दै दाहालले भ्रष्टाचारको मुद्दा लागेको विजय गच्छदार धरौटीमा छुटेको घटना र आफताब आलमका विषयमा प्रधानमन्त्रीले दिएको अभिव्यक्तिले सत्तालाई दुरुपयोग गरेर अदालतलाई प्रभावित पार्न खोजिएको प्रष्ट हुने दाबी गरे।

उनले स्वास्थ्य राज्यमन्त्री र योजना आयोगका उपाध्यक्षमा पनि बिजनेश पार्टनरलाई नियुक्त गरिएको भन्दै सरकारले शुभ संकेत नदेखाएको टिप्पणी गरे।

नेकपा एमालका सांसद दाहालले वर्तमान सरकारले बाढीपीडितहरुलाई राहत देला जस्तो आफूलाई नलागेको सुनाए। उनले वर्तमान सरकार परमादेशको सरकार भएको भन्दै कसैकसैले जनादेशको सरकार भनेकोमा आपत्ति प्रकट गरे।

उनले २०७४ सालको आम निर्वाचनको स्मरण गर्दै एमालेलाई धोका दिएर देउवालाई प्रधानमन्त्रीमा विश्वासको मत दिएकाले उनी प्रधानमन्त्री बनेको भन्दै यो परमादेशको सरकार भएको टिप्पणी गरे। साथै उनले संविधानमै नभएको व्यवस्थाअनुसार प्रधानमन्त्री नियुक्त गरिएको बताए।