लुम्बिनीका निवर्तमान प्रदेश प्रमुख यादवको विदाइ

बुटवल- लुम्बिनी प्रदेशका निवर्तमान प्रमुख धर्मनाथ यादवलाई प्रदेश सरकारले विदाइ गरेको छ। उनलाई मुख्यमन्त्री शंकर पोखरेलले बुधबार बिहान विदाइ गरेका हुन्। 

मंगलबार मन्त्रिपरिषद्को सिफारिशमा राष्ट्रपतिले पदमुक्त गरेका प्रदेश प्रमुख यादवको विदाइ गरिएको हो। नयाँ सरकार गठनपछि प्रधानमन्त्री शेरबहादुर देउवा नेतृत्वको सरकारले लुम्बिनी प्रदेश प्रमुख यादवलाई हटाएर उनको स्थानमा गण्डकी प्रदेशका पूर्वप्रदेश प्रमुख अमिक शेरचनलाई नियुक्त गरेको छ।

पार्टी एकतापूर्वको तत्कालीन एमाले र माओवादीको भागवण्डाका आधारमा १८ कात्तिक २०७६ मा लुम्बिनी प्रदेश प्रमुखमा धर्मनाथ यादवलाई मन्त्रिपरिषद्को सिफारिसमा राष्ट्रपति विद्यादेवी भण्डारीले नियुक्त गरेकी थिइन्।

नेपाली कांग्रेसले ७ माघ २०७४ मा प्रथम प्रदेश प्रमुखको रूपमा उमाकान्त झालाई नियुक्त गरे पनि ओली नेतृत्वको सरकारले पछि यादवलाई लुम्बिनी प्रदेश प्रमुखमा नियुक्त गरेको थियो।

साढे २ वर्ष प्रदेश प्रमुख बनेर बाहिरिएका यादवको कार्यभर लोकप्रिय बन्न सकेन। उनी आलोचित बनिरहे। विपक्षी गठबन्धनले उनलाई ‘पार्टीको अमुक कार्यकर्ता’को संज्ञासमेत दिएको थियो। उनीमाथि अल्पमतका मुख्यमन्त्रीलाई नियुक्ति दिएको आरोपसमेत लागेको थियो।