माधवजीहरु सरकारमा जानुहुन्छ, बुधबार मन्त्रालय टुंगो लाग्छ : प्रचण्ड

काठमाडौं– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेकपा एमालेको माधवकुमार नेपाल समूह सरकारमा जाने बताएका छन्। मंगलबार बसेको पार्टी स्थायी कमिटी बैठकमा प्रचण्डले नेपाल समूह सरकारमा जाने ब्रिफिङ गरेका हुन्।

मंगलबार बिहान नेपाल निवास पुगेर प्रचण्डले सरकारमा सहभागिताबारे छलफल गरेका थिए। सो भेटबारे प्रचण्डले स्थायी कमिटी बैठकमा भने, ‘माधवजीहरु सरकारमा आउनुहुन्छ। यस विषयमा बिहान छलफल भएको छ।’ 

स्थायी कमिटी सदस्य गणेश शाहका अनुसार प्रचण्डले बैठकमा भोलि बुधबार मन्त्रालयको भागवण्डा टुंगो लाग्ने बताएका थिए। ‘बुधबार पाँच दलीय गठबन्धनको बैठक बस्छ। त्यसले मन्त्रालयको टुंगो लगाउँछ। माधवजीहरु पनि सरकार आउनुहुन्छ भनेर अध्यक्ष कमरेडले जानकारी गराउनुभएको छ,’ उनले भने।  

सत्ता गठबन्धनमा मन्त्रालयको भागवण्डा टुंगो नलाग्दा मन्त्रिपरिषद् विस्तार हुन सकेको छैन। मन्त्रिपरिषद् विस्तार हुन नसकिरहेका बेला माओवादी अध्यक्ष प्रचण्डले राजनीतिक भेटवार्तालाई तिव्रता दिएका छन्।  

उनले मंगलबार बिहानै एमालेका वरिष्ठ नेता माधव कुमार नेपालसँग भेटवार्ता गरेका थिए। प्रधानमन्त्री शेरबहादुर देउवालाई विश्वासको मत दिएको एमाले माधव नेपाल पक्षले सरकारमा सहभागिताका विषयमा अहिलेसम्म निर्णय गर्न सकेको छैन। 

नेता नेपाललाई भेटेलगत्तै प्रचण्डले प्रधानमन्त्री शेरबहादुर देउवासँग पनि भेट गरेका थिए। सरकार गठन भएको १४ दिन हुँदा समेत अझै १७ वटा मन्त्रालय मन्त्रीविहीन छन्। 

कांग्रेस सभापति शेरबहादुर देउवा असार २९ गते प्रधानमन्त्रीमा नियुक्त भएसँगै कांग्रेस र माओवादीबाट २–२ जनालाई मन्त्री बनाए पनि त्यसपछि मन्त्री थप्न सकेका छैनन्। यसैबीच दुई दिन अघि देउवाले एक जना राज्यमन्त्री थपेका थिए। स्वास्थ्य तथा जनसंख्या मन्त्रालय आफैंसँग राखेर देउवाले राज्यमन्त्रीमा भने शिक्षा व्यापारी उमेश श्रेष्ठलाई ल्याएका छन्। 

माओवादीले पनि आफ्नो भागमा परेको मन्त्रालयका लागि मन्त्रीको नाम दिन सकेको छैन देउवालाई। शनिबारमात्रै प्रचण्डले पार्टीभित्र मन्त्रीका आकांक्षी धेरै हुँदा आफू दबाबमा परेको बताएका थिए। कसलाई मन्त्री बनाउने भन्ने विषयमा आफ्नो दिमागमा आतंक चलिरहेको उनले सुनाएका थिए।

‘म त मन्त्री बन्न दबाब दिने मान्छेको हुलभित्रबाट आएको छु। आतंक छ मेरो दिमागमा कल्लाई मन्त्री बनाउने कसलाई नबनाउने।’ अध्यक्ष प्रचण्डले प्रतिनिधिसभामा रहेका आफ्नो पार्टीका ४९ सांसदमा सबैजसोले मन्त्री बन्ने आकांक्षा राखेको तर गठबन्धन सरकारमा बढीमा ७ वटा मात्रै मन्त्री पाउने बताए। मन्त्री नबनाए नेतृत्वलाई गाली गर्ने प्रवृत्ति देखिएको भन्दै उनले भने, ‘मन्त्री पाएन भने नेतृत्वलाई सरापेर हिँड्ने प्रवृत्ति जबर्जस्त छ।’