एमसीसी पास गराउन अर्थमन्त्री प्रतिबद्ध!

काठमाडौं– अर्थमन्त्री जनार्दन शर्माले एमसीसी पास गराउन सरकार लाग्ने संकेत दिएका छन्। मंगलबार अर्थ मन्त्रालयमा नेपालका लागि अमेरिकी राजदूत र्‍यान्डी बेरीसँगको भेटमा उनले एमसीसी पास गराउने संकेत गरेका हुन्। 

उनले भेटका क्रममा राजदूत बेरीसँग अमेरिकी सरकारको सहयोगमा नेपालमा सञ्चालित परियोजनाहरुको कार्यान्वयन तथा अनुगमनमा सरकारले तदारुकता देखाउने प्रतिबद्धता व्यक्त गरेका थिए। 

एमसीसी अमेरिकाले नेपाललाई दिएको सबैभन्दा ठूलो सहयोग हो। अमेरिकाले नेपालमा एमसीसी लागू भएको पाँच वर्षमा करिब ६० अर्ब रुपैयाँ बराबर पूर्वाधार क्षेत्रमा अनुदान दिने प्रावधान छ। एमसीसी प्रतिनिधिसभामा विचाराधीन छ।

भेटका क्रममा अर्थमन्त्री शर्माले कोभिडविरुद्धको खोप नेपालको पहिलो प्राथमिकताको विषय भएको भन्दै त्यसको आपूर्तिमा अमेरिकी सरकारबाट थप सहयोग र सहजीकरण हुने विश्वास व्यक्त गरेका थिए। 

राजदूत बेरीले कोभिडविरुद्धको लडाइँमा अमेरिका नेपालको साथमा रहेको बताए। विगत ७० वर्षदेखि अमेरिकाले नेपालको स्वास्थ्य र शिक्षाको क्षेत्रमा सहयोग गर्दै आएको प्रसंग उल्लेख गर्दै उनले आगामी दिनमा पनि यसलाई निरन्तरता दिने प्रतिवद्धता जनाए।

कोभिडविरुद्धको खोप अभियानमा सघाउन अमेरिकाले १५ लाख डोज खोप प्रदान गरेको र आगामी दिनमा पनि आवश्यक सहयोग गर्नेतर्फ सकारात्मक रहेको बताए।