कांग्रेसका यी ६८१ कार्यकर्ता, जसले आवेदन दिएको ६ वर्षमा पनि पाएनन् क्रियाशील सदस्यता

काठमाडौं– नेपाली कांग्रेसको १३ औं महाधिवेशनमा विवादमा परेर स्थगनमा रहेका ६८१ जनाको क्रियाशील सदस्यता अझै टुंगो लाग्न सकेको छैन। विवादका कारण १४ औं महाधिवेशनका लागि स्थगनमा राखिएका उनीहरुको सदस्यताबारे रमेश लेखक नेतृत्वको क्रियाशील सदस्यता छानविन समिति अनिर्णित बनेको छ। 

सोलुखुम्बुका ५१५ जना र बाराका १६६ जनाको क्रियाशील सदस्यताबारे समितिमा सहमति जुट्न नसकेको हो। समितिले सभापति शेरबहादुर देउवालाई मंगलबार बुझाएको प्रतिवेदनमा उनीहरुको सदस्यताबारे सहमति जुट्न नसकेकाले नेतृत्व समक्ष पठाउने निर्णय गरेको उल्लेख छ।  

‘तेह्रौं महाधिवेशनमा क्रियाशील सदस्यता छानविन समितिबाट सोलुखुम्बु जिल्लाका ५१५ जना र बाराका १६६ जनाको बारेमा यस समितिमा सहमति कायम हुन नसकेका कारण यस विषयलाई पार्टी नेतृत्व समक्ष पठाइएको छ,’ प्रतिवेदनमा भनिएको छ। 

कांग्रेसले विवादित स्थानका क्रियाशील सदस्यतामा सहमति जुट्न नसके अर्को महाधिवेशनका लागि स्थगन गर्दैै आएको छ। १२ औं महाधिवेशनबाट यस्तो अभ्यास सुरु भएको थियो। 

१२ औं महाधिवेशनमा काठमाडौं, नुवाकोट र रुपन्देहीका र १३ औं महाधिवेशनमा ३३ वटा निर्वाचन क्षेत्र र केही पालिकाका वडाका नयाँ क्रियाशील सदस्यता स्थगन गरी महाधिवेशनपछि टुंगो लगाएको थियो। तर, तीमध्ये पनि १३ औं महाधिवेशनका ६८१ जनाको सदस्यताको टुंगो अझै लाग्न सकेको छैन। 

यस्तै सप्तरी र बारा जिल्लाको क्रियाशील सदस्यता सम्बन्धी कागजात ढिला गरी प्राप्त भएकाले ती जिल्लाका नयाँ क्रियाशील सदस्यताका बारेमा समितिले छलफल नगरेको प्रतिवेदनमा उल्लेख छ।