आधिकारिकता पाएपछि जसपाले बोलायो केन्द्रीय कार्यकारिणी समिति बैठक

काठमाडौं- जनता समाजवादी पार्टी(जसपा) नेपालले केन्द्रीय कार्यकारिणी समितिको बैठक बोलाएको छ। पार्टीको आधिकारिकता विवाद निर्वाचन आयोगबाट निरुपण भएपछि जसपाले केन्द्रीय कार्यकारिणी समितिको बैठक बोलाएको हो। 

दिउँसो २ बजे पार्टी केन्द्रीय कार्यालय बालकुमारीमा बैठक बोलाइएको कार्यकारिणी समिति सदस्य डम्बर खतिवडाले जानकारी दिए। 

‘हिजो आयोगबाट आधिकारिकता पाएपछि अब कसरी अगाडि बढ्ने भन्ने विषयमा नै छलफल गर्न बैठक बोलाइएको हो,’ उनले भने, ‘त्योसँगै पछिल्लो राजनीतिक घटनाक्रमका विषयमा पनि छलफल केन्द्रित हुन्छ।’ उनले पार्टीको आधिकारिकता विवाद निरुपण नभएकै कारण सरकारमा सहभागी हुने निर्णय यसअघि नभएको भन्दै अब त्यस विषयमा पनि पार्टीले टुंगो लगाउने बताए। 

निर्वाचन आयोगले सोमबार जसपा पार्टी दर्ता हुँदा निर्वाचन आयोगमा पेश भएको केन्द्रीय कार्यकारिणी समितिका सदस्यहरूको सनाखत गरेको थियो। सनाखतका क्रममा उपेन्द्र यादव पक्षमा बहुमत देखिएपछि आयोगले जसपाको आधिकारिकता यादव पक्षलाई दिने फैसला गरेको थियो। 

त्यस्तै अर्को पक्ष महन्थ ठाकुर पक्षलाई अर्को दल दर्ता गर्न आएमा दर्ता गरिदिने निर्णय पनि सुनाएको थियो। आयोगको निर्णयमा संक्षिप्त मात्रै प्रतिक्रिया दिएको महन्थ पक्षले अब के गर्छ भन्ने यकिन भइसकेको छैन। एक नेताले आन्तरिक छलफल गरेर अब कसरी अगाडि बढ्ने भन्ने विषयमा नै छलफल गरेर निष्कर्षमा पुगिने जानकारी दिए।