रेशम चौधरीलाई सनाखत गराउन आयोगका कर्मचारी कारागार जाने

काठमाडौं- जसपाको विवाद निरुपण गर्न पार्टी एकीकरण हुँदाका केन्द्रीय कार्यकारिणी सदस्यको सनाखत गर्न आदेश गरेको निर्वाचन आयोगले जसपा कार्यकारिणी सदस्य रहेका रेशम चौधरीलाई सनाखत गर्न कर्मचारी कारागार नै जाने भएका छन्। 

पूर्व राजपाबाट निर्वाचित भएका जसपाका निलम्बित सांसद रेशम चौधरीलाई सनाखत गर्न कर्मचारी कारागार नै जाने आयोगका प्रवक्ता राजकुमार श्रेष्ठले जानकारी दिए। 

‘हामीले जेलरलाई सनाखतका लागि सहजीकरण गरिदिन भनेर पत्र लेखेका छौं,’ उनले भने,‘त्यहाँ कर्मचारीलाई खटाएका छौं। कुन पक्षमा मत जाहेर गर्ने हो त्यो पक्ष उल्लेख गरेर पठाइन्छ।’

उनले कुन पक्षमा आफ्नो मत जाहेर गर्ने हुन वा तटस्थ बस्ने हुन भन्ने यकिन भएको छैन। टीकापुर घटनामा दोषी ठहर भएपछि चौधरी डिल्लीबजार कारागारमा कैद सजाय काटिरहेका छन्।

साउन ७ गते निर्वाचन आयोगले गठन गरेको इजलासले आधिकारिकताको टुंगो लगाउन पार्टी निर्वाचन आयोगमा दर्ता गर्दाका ५१ जना नै कार्यकारिणी सदस्यलाई सनाखतका लागि आयोगमा उपस्थित हुन आदेश गरेको थियो। 

सनाखतका लागि निर्वाचन आयोगले कानुनका सहसचिवलाई तोकेको छ। सचिवालयमा सनाखत भइसकेपछि व्यहोरा चाहि इजलासमा पेश हुने छ। त्यसपछि इजलासको बैठकले आवश्यक निर्णय गर्नेछ।