बरु ऋण लिन्छौँ, खोप सबैलाई दिन्छौँ : प्रधानमन्त्री देउवा

काठमाडौं- प्रधानमन्त्री शेरबहादुर देउवाले हरेक नागरिकलाई सरकारले खोप उपलब्ध गराउने प्रतिबद्धता दोहोर्‍याएका छन्। आफ्नो नेतृत्वमा सरकार बनेदेखि नै सबैलाई निशुल्क खोप दिने बताउँदै आएका देउवाले पुनः आफ्नो प्रतिबद्धता दोहोर्‍याएका हुन्। 

आफ्नो नेतृत्वमा सरकार बनेपछिको पहिलो क्याबिनेट बैठकबाट उनले आगामी चैतसम्ममा सबैलाई खोप दिइसक्ने निर्णय गराएका थिए।शुक्रबारको प्रतिनिधिसभा बैठकमा आफूलाई बधाई दिने सांसदहरुप्रति धन्यवाद दिँदै प्रधानमन्त्री देउवाले भने, ‘हामी ऋण लिएर भए पनि, जति महंगो भएपनि किनेर जनतालाई खोप पुर्‍याउने प्रतिबद्धता पूरा गर्छौं।’

प्रतिनिधि सभामा नै सबै नागरिकलाई खोप उपलब्ध गराउने प्रधानमन्त्री देउवाको यो दोस्रो पटकको प्रतिबद्धता हो। यसअघि गत साउन ३ गते विश्वासको मतका लागि प्रस्ताव राख्दै प्रधानमन्त्री देउवाले सबै नागरिकलाई निशुल्क खोप उपलब्ध गराउने प्रतिबद्धता व्यक्त गरेका थिए।