माइत हिँडेकी खेट्टी मल्ल जंगलमा मृत भेटिइन्

काठमाडौं– बैतडीमा बेवारिसे अवस्थामा फेला परेको शवको सनाखत भएको छ। जिल्लाको मेलौली नगरपालिका–७ ल्वाथलीमा शुक्रबार बिहान फेला परेको शव डडेल्धुराको भागेश्वर गाउँपालिका–३ लामीकाँडेकी ३६ वर्षीय खेट्टी मल्लको रहेको जिल्ला प्रहरी कार्यालयले जनाएको छ। 

जिल्ला प्रहरी कार्यालय बैतडीका प्रवक्ता बोधराज ओझाका अनुसार मल्ल माइतीघर शेरा जानका लागि बिहीबार डडेल्धुराबाट हिँडेकी थिइन्। त्यसपछि उनको सम्पर्क को–कोसँग भयो भन्ने खोजी भइरहेको र प्रत्यक्षदर्शी खोज्ने प्रयास भइरहेको प्रहरीले बताएको छ। मल्लको मृत्युको कारण खुल्न नसकेको प्रहरीले जनाएकोे छ।

घटनाबारे अनुसन्धानका लागि घटनास्थलमा प्रहरी उपरीक्षकसहितको टोली खटिएको  ओझाले जानकारी दिएका छन्। मल्लकोे शरीरमा घाउचोट केही नरहेकाले अहिले नै हत्या वा मृत्यु के हो खुल्न नसकेको प्रहरीको भनाइ छ।

मेलौली नगरपालिकाकी उपमेयर राधा ओझाका अनुसार मृतक महिलाकोे शव नजिकै झोला र छाता भेटिएको छ।