चीनबाट ल्याइने १६ लाख डोज कोरोना खोप बिहीबार नेपाल आइपुग्दै

काठमाडौं- चीनसँग खरिद गरिएको ‘भेरोसेल’खोप लिएर नेपाल वायु सेवा निगमको जहाज आज काठमाडौ आइपुग्दै छ। १६ लाख डोज खोप बोकेर जहाज दिउँसो २ बजे काठमाडौं आइपुग्ने स्वास्थ्य मन्त्रालयका प्रवक्ता डा. कृष्णप्रसाद पौडेलले जानकारी दिए।  

बुधबारराति गएको जहाज आज आइपुग्ने निगमले जनाएको छ। सरकारले चीन सरकारसँग सरकार–सरकार (जिटुजी) मार्फत खोप ल्याएको हो।

भेरोसेल लिएर आएको जहाज फेरि खोप लिन आजै बेइजिङ उड्ने र खोप ल्याउनका लागि बुधबार, बिहीबार र शनिबारका लागि नयाँ तालिका तय गरेको नेपाल वायु सेवा निगमले जनाएको छ।

सरकारले चीनसँग खरिद गरेको भेरोसेल खोप ३२ लाख डोज र चीनले अनुदानमा दिन लागेको १६ लाख डोज खोप ल्याइने मन्त्रालयका प्रवक्ता पौडेलले जानकारी दिए। ४८ लाख डोजमध्ये केही दिनभित्रै २५ लाख ल्याइने उनले बताए। 

जसका लागि आजदेखि तीन उडानमार्फत नियमीत खोप ल्याइने मन्त्रालयले जनाएको छ। सरकारले चीनसँग खरिद गरेको ४० लाख डोजमध्ये ८ लाख डोज खोप ल्याइसकिएको छ।