पार्किङ गरिएको मोटरसाइकलमाथि पुरुषको शव फेला

विराटनगर- विराटनगरमा रोकिराखेको मोटरसाइकलमाथि एक जना पुरुषको शव फेला परेको छ। सोमबार राति विराटनगर महानगरपालिका-५ बिजुली अफिस चोकमा रोकिराखेको मोटरसाइकलमा बसेको जस्तै अवस्थामा शव फेला परेको प्रहरीले जनाएको छ।

जिल्ला प्रहरी कार्यालय मोरङका अनुसार को४प २३१६ नम्बरको मोटरसाइकलमा शव फेला परेको हो। मृत भेटिएका व्यक्ति विराटनगर-५ मुनालपथका ६७ वर्षीय सुदर्शन न्यौपाने रहेको प्रहरी प्रमुख एसपी जनार्दन जिसीले जानकारी दिए। न्यौपानेलाई राति ८ः३० बजेतिर मृत फेला पारिएको एसपी जिसीले बताए।

शव पोष्टमार्टमका लागि कोशी अस्पताल विराटनगर पठाएको छ। ‘घटनास्थलको अवस्था हेर्दा स्टेण्ड लगाएको मोटरसाइकलमाथि सुतेर आराम गरेजस्तो देखिन्छ,’ उनले भने, ‘स्वास्थ्यमा कुनै समस्या आएर आराम गर्ने क्रममा मोटरसाइकलमाथि नै मृत्यु भएको हो कि भन्ने आशंका छ।’ जिसीका अनुसार मोटरसाइकल न्यौपानेकै भएको खुलेको छ।

मोटरसाइकल चलाउन खोजेजस्तो ‘पोजिसन’मा शव भेटिएको प्रहरीले जनाएको छ। उनको शव भेटिएको समयमा विराटनगरमा भीषण वर्षा भइरहेको थियो।