लगातारको वर्षाले धनगढी डुबानमा, निकास नखोले धनगढीमा 'ब्लाक आउट'!

धनगढी- लगातारको वर्षाले धनगढीका विभिन्न क्षेत्र डुबानमा परेका छन्। लगातारको वर्षाले नेपाल विद्युत प्राधिकरण धनगढी वितरण केन्द्रसमेत डुबानमा परेको छ। धनगढी वितरण केन्द्रअघिको डुबानको निकास नखोले धनगढीमा ब्ल्याक आउट हुने सक्ने केन्द्रले जनाएको छ। 

केन्द्रका प्रमुख सुरेन्द्र चौधरीका अनुसार कार्यालय डुबानमा पर्दा स्टकमा राखिएका विधुतीय सामाग्रीमा क्षति पुगेको बताए। सब-स्टेसनसमेत जलमग्न भएका कारण केबल ट्रेन्चमा पानी पसेको छ। 

‘ट्रेन्चमा पानी पसेर लिकेज भए ट्रेन्च भत्किने सम्भावना छ। केबलमा समस्या आए सब स्टेसनबाट विद्युतको आपूर्ति रोकिन्छ,' चौधरीले भने, ‘विद्युत प्रवाह गर्न लामो समय लाग्छ। धनगढीमा ब्लाक आउट हुन सक्छ।’ उनले पानी निकास खोल्न सबैसँग अनुरोध गरेपनि निकास नखुलेको बताए। 

वर्षाको पानी वडा नम्बर ४ बाट वडा नम्बर ३ हुँदै वडा नम्बर २ तर्फ बहने गर्दछ। तर, वडा नम्बर २ का बासिन्दाले पानी निकास नै बन्द गरिदिएपछि वडा नम्बर ३ मा रहेको धनगढी वितरण केन्द्र डुबानमा परेको हो।