माधव नेपाललाई भेट्न दाहाल कोटेश्वरमा, भेटवार्ता जारी

काठमाडौं- नेकपा एमालेका वरिष्ठ नेता माधव कुमार नेपाललाई भेट्न नेकपा माओवादी केन्द्रका अध्यक्ष पुष्पकमल दाहाल कोटेश्वर पुगेका छन्। नेपाल निवास कोटेश्वरमा नेपाल र प्रचण्डबीच साढे १ बजेदेखि भेटवार्ता भइरहेको छ।

उनीहरुबीच पछिल्लो राजनीतिक अवस्था, यसअघिको पाँच दलीय विपक्षी गठबन्धन (हाल सत्तारुढ) को अबको चुनौतीलगायतका विषयमा छलफल भइरहेको बताइएको छ।

संसद पुनर्स्थापना गर्ने सर्वोच्चको आदेश र प्रधानमन्त्रीमा शेरबहादुर देउवालाई नियुक्त गर्ने परमादेशपछि नेता नेपालले आफूहरु अब देउवा नेतृत्वको गठबन्धनमा नरहेको जानकारी गराएका थिए।

योसँगै देउवा नेतृत्वको सरकारले संसदबाट एक महिनाभित्र लिनुपर्ने विश्वासको मत गुमाउन सक्ने आंकलन गरिएका बेला दुई नेताबीचको भेटलाई महत्वका साथ हेरिएको छ। हाल देउवा नेतृत्वको सरकारमा माओवादीबाट दुई जना मन्त्री भएका छन्।

गठबन्धनका अन्य दललाई सरकारमा सहभागी गराउने प्रयास भइरहे पनि सफल हुन सकेको छैन।