एमाले नेता विष्ट भन्छन्, एमालेलाई कुनै पनि सर्तमा एकताबद्ध बनाउँछौं

काठमाडौं– एमाले सचिव गोकर्ण विष्टले दोस्रो तहका नेताहरु कुनै पनि सर्तमा पार्टीलाई एकताबद्ध बनाउन सक्रिय रहेको बताएका छन्।
सिंहदरबारस्थित पार्टी संसदीय दलमा अनौपचारिक छलफलपछि पत्रकारसँग कुरा गर्दै उनले यस्तो बताएका हुन्। ‘कुनै पनि सर्तमा एकताबद्ध बनाउछौं भनेर नै हामी लागिरहेका छौं,’ उनले भने, ‘त्यसैले अनौपचारिक छलफल गरेका हौं।’

सबैको गम्भीर सरोकार भनेको पार्टी एकतालाई जोगाउने रहेको भन्दै उनले दसबुँदे सहमतिलाई आधार बनाएर पार्टी एकता कसरी जोगाउने भन्ने तर्फ नै छलफल केन्द्रित रहेको बताए।  ‘नेकपा एमालेलाई एकताबद्ध गर्न आमपार्टी पंक्ति चिन्तित छ। लामो समयको योगदानबाट निर्माण भएको पार्टीलाई एक बनाउन हामीले चिन्ता गर्नु स्वाभाविक नै हो,’ विघटित कार्यदलका सदस्य समेत रहेका उनले भने, ‘प्रयत्न जारी राख्नुपर्दछ। नेताकार्यकर्तामा देखिएको चिन्तालाई ध्यानमा राख्नुपर्छ।’

एमालेमा देखिएको विवाद समाधानका लागि गठित कार्यदलको सहमति अनुमोदन गर्दै शुक्रबार स्थायी कमिटी बैठकले कार्यदल भंग गरेको छ। शुक्रबार बसेको एमाले स्थायी कमिटीमा वरिष्ठ नेता माधवकुमार नेपाल पक्ष सहभागी नभएपछि एमाले विवाद थप चुलिएको छ। विवाद चुलिँदै गएपछि समाधानका लागि दोस्रो तहका नेताहरू सक्रिय भएका हुन्।