साउन ३ गतेका लागि संसद अधिवेशन आह्वान

काठमाडौं- संघीय संसदका दुवै सदन प्रतिनिधिसभा र राष्ट्रियसभाको अधिवेशन आगामी साउन ३ गतेलाई आह्वान गरिएको छ। सरकारको सिफारिसमा राष्ट्रपति विद्यादेवी भण्डारीले बिहीबार संघीय संसदका दुवै सदनको अधिवेशन आह्वान गरेकी हुन्।

मन्त्रिपरिषदको बिहीबार बसेको बैठकले संसद अधिवेशन आह्वानका लागि राष्ट्रपति समक्ष सिफारिस गरेको थियो। गत जेठ ८ मा विघटन गरिएको प्रतिनिधिसभाको अधिवेशन सर्वोच्च अदालतले बदर गरेपछि पहिलोपटक बोलाइएको हो। मन्त्रिपरिषद्को सिफारिस अनुसार संसद बैठक साउन ३ गते आइतबार दिउँसो ४ बजे नयाँ बानेश्वरस्थित संसद भवनमा बस्नेछ।

सर्वोच्च अदालतले गत सोमबार प्रतिनिधिसभा विघटन बदर गर्दै साउन ३ गते अधिवेशन बोलाउनसमेत फैसला गरेको थियो। सर्वोच्चको सो फैसलाअनुसार नै मन्त्रिपरिषद् बैठकले अधिवेशन आह्वानका लागि सिफारिस गरेको हो। 

तत्कालीन प्रधानमन्त्री केपी शर्मा ओलीले पहिलोपटक गत पुस ५ मा र दोस्रो पटक जेठ ८ मा प्रतिनिधिसभा विघटन गरी मध्यावधि चुनाव घोषणा गरेका थिए।सर्वोच्चले पहिलो पटक फागुन ११ मा र दोस्रो पटक गत सोमबार प्रतिनिधिसभालाई ब्यूउँताउने फैसला गरेको हो।