ओली सरकारले बढाएको यातायात भाडा नघटाए आन्दोलन गर्ने विद्यार्थी संगठनको चेतवानी 

काठमाडौं- सत्तारुढ पार्टी निकट पाँच विद्यार्थी संगठनले केपी ओली सरकारले बढाएको यातायात भाडा तत्काल फिर्ता गर्न सरकारसँग माग गरेका छन्। 

अखिल (छैठौं ) को कार्यालयमा आज बसेको बैठकले तत्काल भाडा घटाउन माग गरेको हो। बैठकपछि बिहीबार विज्ञप्ति जारी गर्दै तत्काल भाडा फिर्ता नगरिए आन्दोलनमा उत्रने समेत उनीहरुले चेतावनी दिएका छन्। 

जाँदाजाँदै ओली सरकारको निर्देशन बमोजिम यातायात व्यवस्था विभागले सार्वजनिक यातायातको भाडा २० देखि २८ प्रतिशतसम्म बढाएको थियो। यात्रुवाहक सवारीको भाडा सबैभन्दा बढी २८ प्रतिशतले बढाइएको थियो। 

साउन १ गते यातायात व्यवस्था विभागमा ज्ञापनपत्र पेश गरेपछि आन्दोलनका थप कार्यक्रम घोषणा गरिने अखिल (क्रान्तिकारी)का अध्यक्ष रन्जित तामाङले जानकारी दिए। 

पाँच विद्यार्थी संगठनमा कांग्रेस निकट नेविसंघ, माओवादी केन्द्रनिकट अखिल (क्रान्तिकारी) माधव नेपाल पक्षीय अनेरास्ववियू, जसपा निकट समाजवादी विद्यार्थी युनियन र राष्ट्रिय जनमोर्चानिकट अखिल (छैठौँ) छन्।