बारामा ट्रकको ठक्करबाट प्रहरी सहायक निरीक्षकको मृत्यु

काठमाडौं- बारामा बुधबार राति भएको सवारी दुर्घटनामा प्रहरी सहायक निरीक्षकको मृत्यु भएको छ। बाराको महागढी नगरपालिका २ स्थित भुतही पुल नजिक बुधबार राति सवा नौ बजे प्रदेश २–०३–००१ ख ०७१५ नम्बरको ट्रकले स५प ९५३७ नम्बरको मोटरसाइकललाई ठक्कर दिँदा प्रहरी सहायक निरीक्षक ४४ वर्षीय रमेशकुमार राउतको घटनास्थलमै मृत्यु भएको हो।

मोटरसाइकलमा सवार पर्साको सखुवा प्रसौनी गाउँपालिका-६ घर भइ रौतहटको इलाका प्रहरी कार्यालय सन्तपुरमा कार्यरत प्रहरी सहायक निरीक्षक राउतको घटनास्थलमै ज्यान गएको प्रहरीले जनाएको छ।

रौतहट सन्तपुरस्थित प्रहरी कार्यालयबाट बुधबार राति मोटरसाइकलमा घर फर्किंदै गर्दा राउत सवार मोटरसाइकललाई ट्रकले ठक्कर दिएको थियो। 

मृतकको शव पोष्टमार्टमका लागि जिल्ला अस्पताल कलैयामा पठाइए छ। ट्रकसहित चालकलाई भने नियन्त्रणमा लिइएको बाराका प्रहरी प्रवक्ता प्रहरी नायव उपरीक्षक गौतम मिश्रले जानकारी दिए।