दल आधिकारिकता मुद्दाका कारण जसपालाई सरकारमा जान विलम्ब

काठमाडौँ- उपेन्द्र यादव पक्षको जनता समाजवादी पार्टी (जसपा) मंगलबार नै सरकारमा सहभागी नहुने भएको छ। निर्वाचन आयोगले पार्टी आधिकारिकताको विषयमा निर्णय नदिइसकेकाले त्यसलाई दृष्टिगत गरी जसपाले सरकारमा मंगलबारै जानेबारे अनिर्णीत बनेको हो। 

प्रधानमन्त्री बन्ने निश्चित भएपछि शेरबहादुर देउवाले जसपासँग मन्त्रीको नाम माग गरेका थिए। उसले बैठक बसी निर्णय गरेर मन्त्रीको नाम पठाउने भनेको थियो। तर दल आधिकारिकताका कारण तत्कालका लागि रोकिएको छ। दल आधिकारिकताबारे निर्वाचन आयोगमा साउन ३ गते पेसी छ। 

अध्यक्ष उपेन्द्र यादवले कानुनी प्रक्रियाबारे कानुनविदहरुसँग परामर्श गरी निर्णय लिइने बताए। समस्या नहुने परामर्श प्राप्त भए साउन ३ अघि पनि सरकारमा जान सकिने उनको भनाइ छ। 

देउवा नेतृत्वमा ज्ञानेन्द्रबहादुर कार्की, बालकृष्ण खाँण र माओवादी केन्द्रले जनार्दन शर्मा र पम्फा भुसाललाई सरकारमा पठाउने निर्णय भइसकेको छ। 

सर्वोच्च अदालतको परमादेशबमोजिम देउवा मंगलबार राष्ट्रपतिबाट प्रधानमन्त्रीमा नियुक्त भएका हुन्।