संविधानको धारा उल्लेख नगरी राष्ट्रपतिले नियुक्त गरिन् प्रधानमन्त्री

काठमाडौं- राष्ट्रपति विद्यादेवी भण्डारीले नेपाली कांग्रेसका सभापति तथा संसदीय दलका नेता शेरबहादुर देउवालाई प्रधानमन्त्रीमा नियुक्त गरेकी छन्। सर्वोच्च अदालतले असार २८  गते गरेको फैसला बमोजिम राष्ट्रपति भण्डारीले देउवालाई प्रधानमन्त्रीमा नियुक्त गरेको राष्ट्रपतिको कार्यालयले जारी गरेको विज्ञप्तिमा उल्लेख छ। 

राष्ट्रपतिको कार्यालयले आधिकारिक रूपमा जारी गरेको विज्ञप्तिमा प्रधानमन्त्रीमा नियुक्त गर्दा संविधानको कुन धारामा टेकेर गरिएको भन्ने चाहिँ खुलाइएको छैन। 

'सम्माननीय राष्ट्रपति श्रीमती विद्यादेवी भण्डारीज्यूबाट श्री सर्वोच्च अदालत, संवैधानिक इजलासको मिति २०७८/३/२८ को फैसला बमोजिम प्रतिनिधिसभाका सदस्य एवम् नेपाली कांग्रेस संसदीय दलका नेता माननीय श्री शेरबहादुर देउवाज्यूलाई प्रधानमन्त्री पदमा नियुक्त गर्नुभएको छ,' कार्यालयले जारी गरेको विज्ञप्तिमा यति मात्र भनिएको छ। 

यसैबीच नवनियुक्त प्रधानमन्त्री शेरबहादुर देउवाले मंगलबार साँझ ६ बजे शीतल निवासमा राष्ट्रपति भण्डारीसँग सपथग्रहण गर्दैछन्। सुरुमा सानो आकारको मन्त्रिपरिषद् बनाउने तयारी गरेका देउवाले मंगलबारै केही मन्त्रीहरूलाई सपथ ग्रहण गराउने तयारी गरेका छन्।