नकारात्मक सोच भएकाहरुले दसबुँदेप्रति भ्रम फैलाइरहेका छन् : नेम्बाङ

काठमाडौं– एमाले नेता सुवास नेम्बाङले पार्टीभित्रको विवाद समाधानका लागि गठित कार्यदलले गरेको १० बुँदे सहमतिप्रति नकारात्मक सोचाइ भएकाहरूले भ्रम फैलाइरहेको टिप्पणी गरेका छन्। सहमतिका विषयमा वरिष्ठ नेता माधवकुमार नेपाल पक्षका नेताहरूले विभिन्न टीकाटिप्पणी गर्न थालेपछि नेम्बाङको यस्तो प्रतिक्रया आएको हो।

उनले नेपाल समयसँग भने, ‘१० बुँदे सहमति भइसकेपछि सकारात्मक सोच नभइरहेकाहरूले विभिन्न हैल्ला फैलाइरहेका छन्।’ ओलीतर्फबाट कार्यदलका संयोजकसमेत रहेका नेम्बाङले सहमतिले पार्टी विवाद समाधान हुने बताए।

दसबुँदे सहमतिलाई लिएर वरिष्ठ नेता नेपालले आइतबार राति नै असन्तुष्टि जनाएका थिए। यस्तै नेपाल निकट नेताहरू विजय पौडेल, राजेन्द्र राई, रामकुमारी झाँक्रीलगायतले सहमतिप्रति विरोध जनाएका छन्।

पौडेलले प्रतिगमनका अगाडि घुँडा टेकेको भन्दै आपत्ति जनाएका छन्। उनले भनेका छन्, ‘सहमतिको लिखत प्रतिगमनका अगाडि घुँडा टेकेको हो। प्रतिनिधिसभा बिघटन गर्नु गलत थियो’ सम्म भन्न नसक्ने यस्तो सहमतिले पार्टी एकता हुन्न।’