भैरहवाको सुन्दर्स ग्लासमा आगलागी, ८ करोड क्षति

बुटवल- रुपन्देहीको भैरहवास्थित एक पसलमा आगलागी हुँदा ८ करोड बराबरको क्षति भएको छ। सिद्धार्थनगर–८ नारायणपथमा रहेको सुन्दर्स ग्लास एण्ड फ्रेम हाउसमा शनिबार रातिदेखि आइतबार बिहानसम्म आगलागी भएको थियो। अगालागी ८ घण्टापछि नियन्त्रणमा आएको छ। 

रातको करिब ९ बजे विद्युत सर्ट भई लागेको आगो नगरपालिकासहित छिमेकी पालिकाहरूबाट आएका एक दर्जनभन्दा धेरै दमकलहरू परिचालन गरी नियन्त्रणमा लिइएको हो।

तौलिहवा, रामग्राम, बर्दघाट, बुटवल, लुम्बिनी, सैनामैना, भैरहवा विमानस्थल, नेपाल आयल निगम लगायतका दमकलले विहान ४ बजेपछि मात्र आगो नियन्त्रणमा लिएका थिए। 

भुईँ तल्लामा अगाडि फ्रेम र सिसाको पसल तथा पछाडी प्लाइउडको ठूलो गोदाम रहेको थियो। माथिल्लो तल्लामा गोदाम सहित परिवार पनि बस्दै आएका थिए।  हाल भैरहवामा पानी परेकोले परिवारहरु बाहिर नै रात गुजार्नु परेको थियो। घर भत्किने डरले कोही पनि घर भित्र प्रवेश गर्न सकेका छैनन्।

आगालगी भएपछि परिवारको सकुशल उद्वार गरे पनि बाँधिरहेको कुकुर भने मरेको छ।

पसलका साथै घरायसी समान, मोटरसाइकल, नगद रकमसमेत जलेर नष्ट भएको छ। पसलको बीमा थियो वा थिएन भन्ने स्पष्ट जानकारी आएको छैन। 

आगालागीबाट अनुमानित करिब ८ करोड बढीको क्षति भएको सुन्दर हार्डवेयरका सञ्चालक आकाश अग्रहरीले जानकारी दिए।