माधव नेपाल सचिवालयको दाबी : स्वास्थ्यलाभको कामना गर्न मात्र प्रचण्ड आउनुभएको हो

काठमाडौँ- नेकपा (एमाले)का वरिष्ठ नेता माधवकुमार नेपालको सचिवालय नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ स्वास्थ्यलाभको कामना गर्न मात्र आफ्नो निवासमा आएको दाबी गरेको छ। 

एमाले विवाद समाधानको अन्तिम रूप दिन कार्यदलको बैठक बस्नुअघि प्रचण्डसँग नेपालको भेटबारे केपी शर्मा ओली पक्ष सशंकित भएपछि नेपालको सचिवालयले यस्तो स्पष्टीकरण दिएको हो। प्रचण्ड शनिबार दिउँसो नेपाल निवास पुगेका थिए। 

'पूर्वप्रधानमन्त्री तथा नेकपा (एमाले)का वरिष्ठ नेता माधवकुमार नेपाल विगत केही दिन यता स्वास्थ्यमा समस्या (जनै खटिरा) आई चिकित्सकको सल्लाह अनुसार घरमै आराम गरिरहनुभएको छ। आज नेकपा माओवादी केन्द्रका अध्यक्ष कमरेड पुष्पकमल दाहाल ‘प्रचण्ड’ कोटेश्वर निवासमा पुगी उहाँको स्वास्थ्य अवस्थाको वारेमा जानकारी लिनुका साथै स्वास्थ्यलाभको कामना गर्नुभएको छ। उहाँको स्वास्थ्य समस्याका कारण आज संक्षिप्त भेट भएको र अन्य विषयमा कुरा नभएको स्पष्ट पार्दछु,' वरिष्ठ नेता नेपालका स्वकीय सचिव मोहन गौतमले जारी गरेको विज्ञप्तिमा लेखिएको छ।