विद्युत प्रसारण क्षेत्रमा रुखका हाँगाबिँगा काटिँदै, कर्णालीमा आज विद्युत अवरुद्ध हुने 

सुर्खेत- सुर्खेतसहित कर्णाली प्रदेशमा आज (शनिबार) विद्युत अवरुद्ध हुने भएको छ। बिहान ९ बजेदेखि साँझ ५ बजेसम्म विद्युत अवरुद्ध हुने भएको छ।

कोहलपुर–सुर्खेत ३३ केभीए विद्युत प्रसारण क्षेत्रमा रुखका हाँगाबिँगाहरु काट्नुपर्ने भएकाले विद्युत अवरुद्ध हुने नेपाल विद्युत प्राधिकरण सुर्खेत वितरण केन्द्रले जनाएको छ।

कोहलपुर–सुर्खेत विद्युत प्रसारण क्षेत्रमा बर्दिया राष्ट्रिय निकुञ्जसहित अधिकांश भागमा जंगल पर्दछ।

बर्खायाममा आउने हावाहुरीबाट रुखका हाँगाबिँगाहरू खसेर तारमा टाँगिने र पटक–पटक विद्युत अवरुद्ध हुन थालेपछि रुखका हाँगा काट्न परेको सुर्खेत वितरण केन्द्रका प्रमुख टंकराज गिरीले जानकारी दिए।

कोहलपुर–सुर्खेत ३३ केभीए विद्युत प्रसारण बन्द हुँदा कर्णालीका कालीकोट, दैलेख, सुर्खेत, जाजरकोटसहित रुकुमपश्चिम र सल्यानको पश्चिम क्षेत्रमा विद्युत अवरुद्ध हुने छ।