२१ दिन जंगलमा बसेको कुरा झुटो, जात नभई उमेरका कारण किशोरीलाई घर फर्काएको अभिभावकको दाबी

धनगढी- अन्तरजातीय विवाह गरेका कारण धम्की आएपछि २१ दिनदेखि जंगलमा बस्न बाध्य भएको दाबी गर्दै आएका कैलालीका किशोर-किशोरी प्रहरीको सम्पर्कमा आएका छन्। 

जिल्लाको भजनी नगरपालिका-४ का प्रकाश विश्वकर्मा र जानकी गाउँपालिकाकी मालती रावल प्रहरीको सम्पर्कमा आएका हुन्। 

ईलाका प्रहरी कार्यालय भजनीमा प्रकाश सम्पर्कमा आएका हुन् भने मालती धनगढी प्रहरीको सम्पर्कमा आएको प्रहरीले जानकारी दिएको छ। 

आफूहरुलाई ज्यान मार्ने धम्की आएको भन्दै जीवनरक्षाको माग गरिएको भिडियो सामाजिक सञ्जालमा भाइरल भएपछि प्रहरीले उनीहरूको खोजी गरेको थियो।  

जिल्ला प्रहरी कार्यालय कैलालीका प्रहरी उपरीक्षक विश्व अधिकारीले दुवै जना सम्पर्कमा आएको र दुवै जना सुरक्षित रहेको जानकारी दिए। प्रहरीसँगको सोधपुछमा प्रकाशले आफूहरु जंगलमा नबसेको र बुटवलबाट फर्किदाँ जंगलमा भिडियो रेकर्ड गरेर पोस्ट बताएको प्रहरी उपरीक्षक अधिकारीको भनाइ छ। 

किशोरले प्रहरीमा ४ गतेदेखि २३ गतेसम्म आफूहरू बुटवल बसेको बयान दिएका छन्। 'मालतीको परिवारका सदस्यले स्वीकार गर्लान् भनेर बुटवलबाट फर्किँदा एउटा जंगलमा भिडियो बनाएका हौँ,' प्रकाशलाई उद्धृत गर्दै अधिकारीले भने, 'घर फर्किएपछि किशोरीका आफन्तले थाहा पाएको र किशोरको घरबाट किशोरीलाई लगे।' 

किशोरीकी दिदी मालतीले भने जातका कारण नभएर उमेरका कारण बहिनीलाई फिर्ता ल्याइएको बताएकी छन्। मालतीको उमेर १७ वर्ष भएकाले फिर्ता ल्याएर प्रहरीलाई बुझाएको उनको भनाइ छ। 'अन्तरजातीय विवाहका कारण हामीले मालतीलाई फिर्ता ल्याएका होइनौँ। अन्तर्जातीय विवाहको विरोध गरेका पनि होइनौँ,' किशोरीकी दिदीले भनिन्, ‘उमेर नपुगी भएको विवाहको विरोध गरेका हौँ।’ 

युवकले भने विभिन्न सञ्चारमाध्यमसँग आफूहरुको विवाह भइसकेको अवस्थामा २५-३० जना आएर मालतीलाई लगेको बताएका थिए।