बाढीपहिरोमा घर भत्किएका नागरिकलाई कर्णाली प्रदेशले ५० हजार दिने

सुर्खेत– बाढी, पहिरोजस्ता प्राकृतिक विपदमा घर भत्किएका नागरिकलाई कर्णाली प्रदेश सरकारले ५० हजार रुपैयाँ दिने भएको छ।

बिहीबार बसेको मन्त्रिपरिषद् बैठकले प्राकृतिक विपद्का घटनाबाट पूर्ण रुपमा क्षति भएका नागरिकलाई राहतस्वरुप ५० रुपैयाँ दिने निर्णय गरेको सरकारका प्रवत्तासमेत रहेका आन्तरिक मामिला तथा कानुन मन्त्री सीताकुमारी नेपालीले जानकारी दिइन्।

जिल्ला प्रशासन कार्यालयहरुले पठाएको विवरणलाई आन्तरिक मामिला तथा कानुन मन्त्रालयले प्रमाणित गरेपछि स्थानीय तह विपद् ब्यवस्थापन समितिले पीडितलाई ५० हजारका दरले रकम उपलब्ध गराउने छ ।

यस्तै बैठकले कर्णाली प्रदेश बिपद् ब्यवस्थापन कोषमा ६ करोड जम्मा गर्ने गरेको छ। कोषमा रकम जम्मा गर्नका लागि आर्थिक मामिला तथा योजना मन्त्रालयलाई रकम निकाशाका लागि स्वीकृति दिइएको छ ।

बैठकले कोरोना नियन्त्रणको लागि अग्रपंतिमा खटिएका चिकित्सक, स्वास्थ्यकर्मी, एम्बुलेन्स, शबवाहन चालक र सरसफाईकर्मीलाई तलवको ५० जोखिम भक्ता उपलब्ध गराउने र मुगुको सोरु गाउँपालिकामा वित्तीय हस्तान्तरण २ करोड ५० लाख बजेट अर्थ विविध भैपरी आउने खर्च शिर्षकबाट बजेट व्यवस्था गर्न स्वीकृति दिएको मन्त्री नेपालीले बताइन्।