यू–२३ को एसिया कप छनोटमा नेपाल, इरान, लेबनान र ताजकिस्तान एकै समूहमा

काठमाडौं- उमेर समुह यू-२३ को एसिया कप छनोटको ड्र सार्वजनिक भएको छ। एसियाली फुटबल महासंघ (एएफसी)ले सार्वजनिक गरेको तालिका अनुसार नेपाली टिमले छनोटमा अब इरान, लेबनान र ताजकिस्तानसँग खेल्नेछ।

उज्वेकिस्तानमा हुने एसिया कप २०२२ को छनोटमा अहिले नेपाल समूह 'बी'मा छ। ११ समूह रहेको छनोटमा ४२ टिम सहभागी रहेका छन्। यो छनोटबाट अब १५ टिम एसिया कपमा पुग्नेछन्।

यता आयोजक राष्ट्रका रुपमा उज्वेकिस्तानले प्रतियोगितामा स्थान बनाइसकेको छ। तालिकाको पश्चिमी क्षेत्रमा पश्चिम, दक्षिण र सेन्ट्रल जोनका २३ टिम सहभागी छन्। त्यस्तै, पूर्वी क्षेत्रमा १९ टिम सहभागी बन्नेछन्।

पश्चिमी क्षेत्रमा छ समूह छन्। पश्चिमी क्षेत्रका पाँच समूह समान ४-४ टिमका छन् भने एक समूहमा तीन टिम छन्।

त्यस्तै, पूर्वी समूहमा चारचार टिमका चार समूह छन् भने तीन टिमको एक समूह छ। यी सबै समूहका विजेता र उत्कृष्ट चार उपविजेता फाइनल प्रतियोगिताका लागि छनोट हुनेछन्।

छनोट खेल २०२१ को अक्टोबर २३ देखि अक्टोबर ३१ सम्म हुनेछ।