विश्व टेस्ट च्याम्पियनसिप : न्युजिल्यान्डको सहज सुरुआत

काठमाडौं- विश्व टेस्ट च्याम्पियनसिपअन्तर्गत न्युजिल्यान्डले आफ्नो पहिलो ब्याटिङमा इन्डियाविरुद्ध सहज सुरुआत गरेको छ।

इंग्ल्यान्डको साउथह्याम्टनमा तेस्रो दिनको खेल सकिँदा न्युजिल्यान्डले दुई विकेटको क्षतिमा १०२ रन बनाएको छ। त्यसका लागि टोम लाथम र डेभावन कन्वेले ओपनिङ ७० रनको साझेदारी गरेका छन्।

लाथम १०४ बलमा ३० र कान्वे १५३ बलमा ५४ रन बनाएर आउट भएका छन्। यता त्यसपछि मैदानमा छिरेका केन विलियम्सन र रोस टेलर अहिले ब्याटिङमा रहँदा ४९ ओभर सकिएको छ।

यसक्रममा इन्डियाका इशान्त शर्मा र रविचन्द्र अश्विनले न्युजिल्यान्डको समान १–१ विकेट लिएका छन्।

इन्डियाले पहिलो इनिङमा २१७ रन जोडेको छ। अजिंक्य रहाणेको सर्वाधिक ४९ रन र कप्तान विराट कोहलीको ४४ रनको सहयोगमा इन्डियाले सो रन जोडेको हो।

इन्डिया कुल ९२ दशमलव एक ओभरसम्म मैदानमा टिकेको थियो। ओपनिङमा आएका रोहित शर्मा र सुभमन गिलले ६२ रनको साझेदारी गरेका थिए। शर्मा ३४ रनमा आउट भएका थिए भने गिल २८ रन बनाउँदै पेवेलियन फर्किए।

यता न्युजिल्यान्डका कायल जेमसनले सार्वाधिक पाँच विकेट लिँदा ट्रेन्ट बोल्ट र निल वेग्नरले समान दुई–दुई विकेट लिए। त्यस्तै, टिम साउथीले एक विकेट गिराएका थिए।

आज दिउँसोबाट चौथो दिनको खेल सुरु हुँदैछ।