निराशाजनक बराबरीपछि स्पेनिस मिडियाको प्रश्न– तिमीले के गर्‍यौ मोरटा?

काठमाडौं– स्वीडेनविरुद्ध युरोकपको पहिलो खेलमा स्पेन बराबरीमा रोकिएपछि मिडियाले स्ट्राइकर आल्भरो मोरटाको आलोचना गरेका छन्। मंगलबार अधिकांश पत्रपत्रिकामा मोरटा हेडलाइन बनेका छन्।

लुइस इनरिकेको टोलीले युरोकपको पहिलो खेलमा जित दर्ता गर्न सकेन। गोल रहित बराबरी भएको खेलपछि मिडियाको आलोचनाको पहिलो शिकार मोरटा बनेका छन्।

‘तिमीले के गर्‍यौं मोराटा?’ मुन्डो डिपार्टिभोले सोधेको छ। उसले मोटराका लागि स्वीडेन विरुद्धको खेल ‘भयानाक रात’ भएको टिप्पणी गरेको छ।

स्पोर्टले २८ वर्षीय मोराटाका खेलमा पूर्ण रुपमा असफल देखिएको टिप्पणी गरेको छ। मार्काले पहिलो पेजको हेडलाइनमा भनेको छ, ‘सबै राम्रो छ, गोलविहीन हुनुबाहेक। प्रदर्शन नियन्त्रित र प्रभावशाली नै थियो।’

एएसले खेलमा सबै कुरा नराम्रो मात्रै नभएको उल्लेख गरेको छ। उसले स्पेनले खेलमा ७५ प्रतिशत बल नियन्त्रणमा राखेको र ९५३ पास खेलेकोे उल्लेख गर्दै यो रेकर्ड भएको बताएको छ।

स्पेनले आगामी खेल पोल्यान्ड विरुद्ध खेल्दैछ। पोल्यान्डले स्लोभाकियासँग आश्चर्यजनक हार व्यहोरेको थियो।