क्रिस्टियन एरिक्सन मैदानमै लडेपछि डेनमार्क र फिनल्यान्डको खेल रोकियो

काठमाडौं– खेलको ४२ औं मिनेटमा मैदानको टचलाइन छेउमा एक्लै हिँडिरहेका थिए क्रिस्टियन एरिक्सन। उनी आफूमा सन्तुलन गुमाउँदै त्यही बेहोस भए। त्यसपछि उनका टिममेटले उनलाई घेरिहाले। साथै उनीहरुले मेडिकल टिम बोलाउन आग्रह गरेपछि तुरुन्त मेडिकले मैदान प्रवेश गर्यो।

यससँगै युरोकपको तेस्रो खेल सुखद् बनेन। डेनमार्कको कोपनहेगनस्थित रंगशालामा प्रतिस्पर्धा गर्दै थिए घरेलु टिम डेनमार्क र पाहुना टिम फिनल्यान्ड।

युरो कप २०२० को प्रतिस्पर्धामा दुवै टिमका लागि संघर्षपूर्ण खेल चलिरहेकै थियो। तर ४२ औं मिनेटपछिको घटनाले सबैलाई स्तब्ध बनायो। त्यसपछि धेरै खेलाडी र प्यारापिटमा उपस्थित खेलाडीले आँशु थाम्न सकेनन्। समर्थकहरु आपसमा अंगालो मारेर रोइरहेका देखिन्थे।

यससँगै प्रतियोगिताको यो खेल पनि रोकिएको छ। खेलाडीको घेराले छेलिएका एरिक्सनलाई मेडिकल टिमले साइडलाइन छेउमै चेस्ट कम्प्रेसन दिएको देखिएको छ।