स्पेन र पोर्चुगलको बहुप्रतीक्षित भिडन्त आज

कठमाडौं- विश्वकप फुटबल प्रतियोगिताअन्तर्गत शुक्रबार तीनवटा खेल हुँदैछन् । साँझ पौने ६ बजे हुने पहिलो खेलमा इजिप्ट र उरुग्वे भिड्दैछन् भने पौने ९ बजे हुने दोस्रो खेलमा मोरक्को र इरान खेल्दैछन् । 

तेस्रो खेलमा पोर्चुगलविरुद्ध स्पेन मैदानमा उत्रिने भएको छ । राती पौने १२ बजे हुने यो खेल निकै रोमाञ्चक हुने अनुमान गरिएको छ । दुबै टिम विश्वकप फुटवको उपाधी दावेदार मानिन्छन् । 

स्पेन र पोर्चुगलबीचको प्रतिस्पर्धालाई क्रिस्टियानो रोनाल्डोविरुद्ध सर्जिओ रामोसको भिडन्तका रूपमा समेत हेरिएको छ । जबकि दुवै स्टार खेलाडी रियल म्याड्रिडबाट व्यवसायिक फुटबल खेल्दै आएका छन् ।

मैत्रीपूर्ण खेलमा पोर्चुगलको प्रदर्शन औसत रहे पनि युरो च्याम्पियन पोर्चुगललाई पहिलोपटक विश्वकप जित्नुपर्ने चुनौती रहँदा २०१० पछि दोस्रोपटक स्पेन उपाधि यात्रामा छ । तर, विश्वकप सुरु हुन एक दिनअघि मात्र प्रशिक्षकलाई बर्खास्त गरेको स्पेनको रणनीति कस्तो हुने भन्ने अन्योलता रहने सम्भावना बलियो छ ।