‘ए’ डिभिजन फुटसल लिग अनिश्चितकालका लागि स्थगित 

काठमाडौं– आउँदो जेठमा आयोजित ‘ए’ डिभिजन फुटसल लिग स्थगित भएको छ। कोभिड–१९ को महामारीका कारण प्रतियोगिता स्थगित गरिएको आयोजक अखिल नेपाल फुटबल संघ(एन्फा)ले जनाएको छ। 

एन्फाले आज सूचना जारी गर्दै भनेको छ, ‘यही जेठ १ गतेबाट हुने भनिएको ए डिभिजन राष्ट्रिय फुटसल लिग २०७८ हाल देशमा कोभिड–१९ बाट उत्पन्न प्रतिकूल परिस्थितिका कारण अर्को सूचना जारी नहुँदासम्म स्थगित भएको छ।’ एन्फाले ए डिभिजन लिगका लागि सातै प्रदेशमा छनोट खेलहरु सम्पन्न गराएको थियो।

तर प्रदेश २ मा कुनै टिमले दर्ता नगरेपछि भने त्यहाँ छनोट खेल भएको थिएन। त्यसको ठाउँमा एन्फा आफैंले सहभागी टिम निर्धारण गरेको थियो। प्रतियोगितामा प्रदेश १, बाग्मती, गण्डकी, लुम्बिनीलगायत टिम सहभागी हुने तय भएको थियो। कर्णाली, लुम्बिनी र सुदूरपश्चिमको भने संयुक्त छनोट लुम्बिनीमा गरिएको थियो। लिगमा सबैभन्दा धेरै बाग्मती प्रदेशका चार टिम सहभागी छन्।