नेयमारले नछाड्ने भए पीएसजी

काठमाडौं - च्याम्पियन्स लिगमा हार बेहोरेपछि पेरिस सेन्ट जर्मेन (पीएसजी)का फरवार्ड नेयमार स्पेनिस क्लब बार्सिलोना फर्कन सक्ने विश्वास गरिएको थियो। तर, ब्राजिलियन फरवनर्ड नेयमारले फ्रेन्च क्लब पीएसजीसँग सम्झौता नवीकरण गरेका छन्। उनले शनिबार मात्र २०२५ सम्मका पीएसजीमै रहने गरी सम्झौता गरेसँगै उनी अब बार्सिलोना नफर्कने भएका हुन्।

२९ वर्षे नेयमारले आफू पीएसजीमै खुसी रहेका कारण नयाँ सम्झौता गरेको बताएका छन्। उनले २०१७ मा विश्वकै सर्वाधिक मूल्य २२० मिलियन यूरोमा पीएसजीमा अनुबन्ध भएका थिए।

त्यसपछि पीएसजीले च्याम्पियन्स लिग नजितेपछि उनी बार्सिलोना फर्कने आशंका गरिँदै आइएको थियो।

यसैबीच उनले सम्झौता नवीकरण गर्दै भनेका छन्, ‘म यहाँ एक व्यक्तिका रुपमा चित्रित भएको छु। र, खेलाडीका रुपमा पनि परिचित छु।’

उनले थपे, ‘मैले यहाँबाट धेरै कुरा सिक्ने अवसर पाएँ। कति कुराहरू पनि भए जुन नभएको भए राम्रो हुने थियो।’ तर उनले पीएसजीमा बिताएका समय धेरै उत्पादनमूलक रहेको दाबी गरेका छन्।

उनले पीएसजीमा जाँदा पाँच वर्षको सम्झौता गरेका थिए। त्यसयता उनले ११२ खेलमा ८५ गोल र ५१ एसिस्ट गरिसकेका छन्। तर, उनले २०१९ मा बार्सिलोना फर्कन चाहेको अभिव्यक्ति दिएपछि उनीसँग पीएजीको बोर्ड र समर्थक रिसाएका थिए।

त्यसलाई इंगित गर्दै उनले भने, ‘हामीले फाइट गर्‍यौं तर म पीएसजीको ऐतिहासिक कदमको हिस्सेदार हुन पाएकोमा खुसी छु। पीएसजीलाई उपाधि दिलाउन सक्दो कोसिस गर्नेछु।’