च्याम्पियन्स लिगको फाइनलमा चेल्सी र सिटी भिड्ने

काठमाडौं – युरोपियन च्याम्पियन्स लिगको फाइनलमा प्रिमियर क्बल म्यानचेस्टर सिटीले उपाधिका लागि चेल्सीसँग प्रतिस्पर्धा गर्ने भएको छ।

बुधबार राति सम्पन्न दोस्रो सेमिफाइनल खेलको दोस्रो लेगेको खेलमा रियल मड्रिडलाई हाराउँदै चेल्सीले फाइनलमा स्थान सुरक्षित गरेको हो।

अघिल्लो हप्ता रियलको मैदानमा भएको पहिलो लेगको खेलमा दुवै टिमले १–१ गोलको बराबरी खेलेका थिए।

तर, चेल्सीको मैदानमा बुधबार राति सम्पन्न खेलमा २–० गोलको जित निकाल्दै चेल्सी फाइनलका लागि तयार भएको हो। गएरातिको खेलमा चेल्सीको टिमो वार्नर र मेसन माउन्टले समान १–१ गोल गरे।

वार्नरले खेलको २८औं मिनेटमा गोल गर्दै टिमलाई अग्रता दिलाए भने माउन्टले दोस्रो हाफको ८५औं मिनेटमा गोल गर्दै अग्रतालाई दोब्बर बनाए।

यससँगै चेल्सीले समग्रमा ३–१ गोलको जित निकालेको हो। अब च्याम्पियन्स लिगको फाइनल खेल आगामि स्तानबुलमा मे २९ मा हुनेछ। मंगलबार रातिको खेलबाट सिटी पीएसजीलाई ४–१ गोलअन्तरले हराउँदै फाइनलमा प्रवेश गरेको थियो।