लुम्बिनीमा अविश्वास प्रस्तावपछि प्रदेश प्रमुखसमक्ष विशेष अधिवेशन माग

बुटवल– लुम्बिनी प्रदेशसभाको विशेष अधिवेशनका लागि विपक्षी गठबन्धनले प्रदेश प्रमुख अमिक शेरचनसमक्ष समावेदन गरेका छन्। मंगलबार प्रदेशसभा सचिवालयमा मुख्यमन्त्री शंकर पोखरेल विरुद्ध अविश्वास प्रस्ताव दर्ता गरेलगत्तै विपक्षी गठबन्धनका नेताहरूले प्रदेश प्रमुखको कार्यालय पुगेर विशेष अधिवेशनको माग गरेका हुन्। 

यसअघि विपक्षी गठबन्धनका नेताहरूले सोमबार प्रदेश प्रमुख शेरचनसमक्ष संविधानको धारा १६८ को उपधारा २ बमोजिमको सरकार गठनका लागि आह्वान गर्न माग गरेका थिए। तर सरकार गठन तथा विस्थापित गर्ने प्रक्रिया प्रदेशसभाबाटै हुने भएकाले विपक्षी गठबन्धनले प्रदेशसभा सचिवालयमा मुख्यमन्त्रीविरुद्ध अविश्वास प्रस्ताव दर्ता गराएका हुन्।

कांग्रेस, माओवादी केन्द्र, जसपा नेपाल र राष्ट्रिय जनमोर्चाले वर्तमान सरकार अल्पमतमा रहेको दाबी गर्दै आएका छन्। लुम्बिनीमा सत्तासिन नेकपा एमालेका ३९ (विमला वलीसमेत) रहेका छन्। नेकपा माओवादी केन्द्र सभामुख सहित १८, नेपाली कांग्रेस १९, जसपा ३ र राष्ट्रिय जनमोर्चाका १ जना सांसद छन्। 

यसअघि विपक्षी गठबन्धनले वैशाख ६ गते मुख्यमन्त्री विरुद्ध अविश्वासको प्रस्ताव पेश गरेका थिए। उक्त प्रस्ताव उपर छलफल गर्न वैशाख १९ गते विशेष अधिवेशन आह्वान गरिए पनि सोही दिन राजीनामा गरि कामचलाउ मुख्यमन्त्रीका रुपमा पोखरेलले अधिवेशन अन्त्य गरेका थिए। सोही साँझ मुख्यमन्त्रीमा पुनः दोस्रो कार्यकाल नियुक्त भएका थिए। 

असंवैधानिक रुपमा मुख्यमन्त्री नियुक्ति भएको भन्दै विपक्षी दलले दोस्रो पटक बैशाख २६ गते अविश्वास प्रस्ताव दर्ता गरेका थिए। तर, निवर्तमान प्रदेश प्रमुख र्धानाथ यादवले विपक्षीले माग गरे अनुसार विशेष अधिवेशन आह्वान गर्न नपर्ने बताएका थिए।