पाल्पा दुर्घटनामा मृत्यु हुनेको संख्या १४ पुग्यो (अपडेट)

पाल्पा-पाल्पामा बिहीबार  बिहान भएको बस दुर्घटनामा मृत्यु हुनेको संख्या १४ पुगेको छ।  बस खस्दा  १० जना घाइते भएका छन् । तानसेनबाट रामपुर जाँदै गरेको लु २ ख ९७५ नम्बरको बस पाल्पाको रम्भा–४ स्थित सडकमा अनियन्त्रित भई डेढ सय मिटर तल खसेको थियो । 

दुर्घटनामा तानसेन –४ का विष्णुमान बज्राचार्य, वडा नम्बर ११ का कृष्ण बहादुर बोहोरा, २ का देवेन्द्रलाल प्रधान र लोकनाथ ढकाल,  ३ की कमला कार्की र बसन्ती खाँड, ४ का दुर्गाबहादुर सारु तथा ६ की गीता बुढाथोकी, सुशीलप्रसाद श्रेष्ठ र सचिन बज्राचार्यको मृत्यु भएको प्रहरीले जनाएको छ । यस्तै, तानसेन ५ की दुर्गादेवी श्रेष्ठ, ३ का कृष्णमान बज्राचार्य र क्षेत्रमान शाक्य तथा तानसेन २ की मुना सारुले पनि दुर्घटनामा ज्यान गुमाएका छन् । 

लक्ष्मी बचत तथा ऋण सहकारी संस्था तानसेनबाट रामपुर भ्रमणमा गएको बस दुर्घटनामा परेको हो । घाईते ९ जनाको तानसेनस्थित मिसन अस्पताल र १ जनाको लुम्बिनी मेडिकल कलेजमा उपचार भैरहेको छ । साघुरो बाटोमा विपरित दिशाबाट आएको मोटरसाइकललाई साईड दिने क्रममा दुर्घटना भएको प्रत्यक्षदर्शीले बताएका छन्।  

घटनास्थल पुगेका सशस्त्र प्रहरी पाल्पाका डीएसपी राजु शाहले घाइतेहरुको उद्धार गरी अस्पतालमा उपचार भइरहेको बताएका छन्।