महाकालीमा खसेको तुइन भेटिएन, एसएसबीले धम्क्याएपछि सञ्चालकले नै बगाइदिए

धनगढी– भारतीय सीमा सुरक्षा बल (एसएसबी) ले तुइन काटेपछि स्थानीय जयसिंह धामी बेपत्ता भएको सर्वत्र चर्चा चलिरहेको बेला बलियो प्रमाणको रुपमा रहेको तुइन भने प्रहरीले फेला पार्न सकेको छैन। 

घटनालगत्तै घटनास्थल पुगेको सशस्त्र प्रहरी नायब उपरीक्षक वीरसिंह धामी नेतृत्वको टोलीले घटना निम्त्याउने तुइन भने फेला पार्न सकेन। टोलीले तुइन सञ्चालक कल्याणसिंह धामीसँग सोधपुछ गर्दा उनले तुइनमा प्रयोग भएको बिजुलीको  फलामको तार महाकाली नदीमा बगाइदिएको बताए। 

वडा नम्बर २ का अध्यक्ष गणेशसिंह धामीले एसएसबीले धम्क्याएपछि तुइन सञ्चालक कल्याणसिंह धामीले तुइन खोलेर महाकालीमा बगाइदिएको बताए। अध्यक्ष धामीले भने, 'एसएसबीले धम्क्याएपछि कल्याणले तुइन खोलेर महाकालीमा बगाइदिएँ।' 

घटनास्थलमा तुइनमा प्रयोग भएको तार फेला नपरेकाे सशस्त्र प्रहरी नायव उपरीक्षक वीरसिंह धामीले बताए। भने, ‘तुइन सञ्चालक कल्याणसिंह धामीले नै तार तानेर फालेका रहेछन्। स्थानीयले एसएसबीले तार काटेको भनेका छन्। तार भेटिएको भए काटेको हो कि होइन पत्ता लाग्थ्यो होला।’ अरु कुरा उनले बताउन मानेनन्। भने, 'अरु कुरा केन्द्रबाट आएको छानबिन टोलीले बताउलान्।'