सुन तस्करीमा मुछिएका एसएसपी खत्री जेल चलान

इटहरी– सुन तस्करी प्रकरणका मुख्य अभियुक्त गोरे भनिने चुडामणि उप्रेतीले पनि मुख्य अभियुक्तको रूपमा नाम लिएका एसएसपी श्याम खत्री जेल चलान भएका छन् । बिहीबार जिल्ला अदालत मोरङमा हाजिर भएका खत्रीको अदालत कर्मचारीले १२ पेज लामो बयान लिएका थिए । 

फरार रहेका उनलाई इन्टरपोलमा रेडकर्नर नोटिस जारी गरिएको थियो । अदालतमा आत्मसमर्पण गरेका उनको बिहीबार नै थुनछेक बहस भएको थियो । न्यायाधीश नारायणप्रसाद शर्माको इजालसले उनलाई पुर्पक्षमा पठाएको हो । आदेशलगत्तै खबीलाई लिएर मोरङ कारागार पठाइएको छ ।

प्रहरी स्रोतका अनुसार एसएसपी खत्री भारतमा लुुकेर बस्दै आएका थिए । 

यसअघि सोही प्रकरणमा पूर्वडीआईजी गोविन्दप्रसाद निरौलासहित २८ जनालाई पुर्पक्षमा पठाइएको छ । उनीहरूलाई सुनसरीको झुम्कास्थित क्षेत्रीय कारागारमा राखिएको छ । 

खत्रीका चालक प्रहरी जवान विष्णुुबहादुर खड्कालाई १५ हजार धरौटी र अंगरक्षक अम्मरबहादुर थापालाई साधारण तारेखमा छाडिएको थियो । 

जिल्ला सरकारी वकिल कार्यालयले १९ वैशाखमा १७ अर्ब एक करोड ८० लाख ७१ हजार चार सय १३ रुपैयाँ ९० पैसा बिगो मागदाबी गर्दै खत्रीसहित ६३ जनाविरुद्ध जिल्ला अदालतमा ‘आपराधिक समूह स्थापना र सञ्चालन गरी सुनको अवैध कारोबार गरेको तथा शरीर बन्धक र कर्तव्य ज्यान’ मुद्दा दर्ता गरेको थियो ।