ओलीले बिमस्टेक महासचिवलाई भने– पानीजहाज चलाऊँ

काठमाडौं– प्रधानमन्त्री केपी ओलीले बहुपक्षीय प्राविधिक तथा आर्थिक सहयोगका लागि बंगालको खाडीको पहल (बिमस्टेक)का महासचिव सहिदुल इस्लामलाई सदस्य मुलुकहरूमा पानी जहाज सञ्चालन गर्न सुझाएका छन् । 

प्रधानमन्त्री ओलीसँग बिहीबार बिहान महासचिव इस्लामले शिष्टाचार भेट गरेका थिए । बिमस्टेकमा नेपालसहित भारत, बंगलादेश, भुटान, श्रीलंका, म्यानमार र थाइल्यान्ड सदस्य छन् । 

आर्थिक र सामाजिक विकासको गतिलाई तीव्रता दिन सदस्य राष्ट्रहरूबीच ‘कनेक्टिभिटी’ जरुरी रहेकामा प्रधानमन्त्रीको जोड थियो । स्रोतका अनुसार बंगालको खाडीसम्म सातै सदस्य राष्ट्रका नदीहरूको पहुँच रहेकाले पानी जहाज सञ्चालन सहज रहेको ओलीले सम्झाए । 

क्षेत्रीय संगठनहरूलाई विकास र समृद्धिको माध्यम बनाउनुपर्नेमा पनि प्रधानमन्त्रीको जोड थियो । खासगरी, बिमस्टेकलाई प्रभावकारी बनाउन अल्प, मध्य र दीर्घकालीन योजना निर्माणमा लाग्न उनले महासचिव इस्लामसँग आग्रह गरे । नेपालले छिट्टै बिमस्टेक सम्मेलनको आतिथ्यता गर्ने कुरामा प्रधानमन्त्रीले विश्वस्त बनाए ।