'सेनाले फास्ट ट्रयाक बनाउन सक्दैन'

काठमाडौं : एमालेको सूर्य चिन्हले चुनाव जितेका  सांसद हृदयेश त्रिपाठीले सेनाले काठमाडौं–तराई द्रुतमार्ग (फास्ट ट्रयाक) नबनाउने दाबी गरेका छन् । 

प्रतिनिधिसभामा बजेटमाथि भएको छलफलमा भाग लिँदै बिहीबार त्रिपाठीको दाबी थियो, 'सेनाले फास्ट ट्रयाक बनाउनै सक्दैन ।' बम र बारुद पड्काउने काम नभएकाले सेनालाई उक्त सडक निर्माणको जिम्मा दिइनु नै गलत भएको उनको भनाइ छ। 

'सरकारले सडक निर्माणको जिम्मा सेनालाई किन दियो, थाहा पाउन सकिएन,' उनले थपे । फास्ट ट्रयाक निर्माण भएन भने त्यहाँ ठूलो मानव बस्ती बस्ने उनको जिकिर थियो ।

सरकारले झन्डै एक वर्षअघि सेनालाई फास्ट ट्रयाक निर्माणको जिम्मा दिएको थियो। प्रधानमन्त्री पुष्पकमल दाहालले २०७४ १४ गते जेठ शिलान्यास गरेको फास्ट ट्रयाक निर्माणलाई चार वर्षभित्र सम्पन्न गर्ने लक्ष्यसहित सेनाले धमाधम काम गरिरहेको छ।