सरकारले राजाको श्रीपेच बाहिर ल्याउने 

काठमाडौं: सरकारले नारायणहिटी दरबार संग्राहलयमा रहेको राजाको श्रीपेच सार्वजनिक गर्ने भएको छ । संस्कृति, पर्यटन तथा नागरिक उडड्यनमन्त्री रविन्द्र अधिकारीले राजसंस्थाको प्रतिकको रुपमा रहेको श्रीपेच तीन महिना भित्र सार्वजनिक गर्ने बताएका हुन् । 

उनले बुधबार नारायणहिटी संग्राहलयको अनुगमन गर्दै तीन महिना भित्र श्रीपेच सार्वजनिक गर्ने गरि तयारी गर्न संग्राहलय प्रशासनलाई निर्देशन दिएका छन् । यसअघिका सरकारले पनि श्रीपेच सार्वजनिक गर्ने प्रतिवद्धता पटक–पटक गर्दै आएका थिए ।  

यस्तै दरबारको अनुगमनको क्रममा नारायणहिटी संग्राहलयको ऐतिहासिकता मर्न नदिन गुरु योजना बनाउने तयारीमा रहेको उनले बताए । उनले दरबार संग्राहलयमा निर्माणाधिन गणतन्त्र स्मारकको काम पनि छिट्टै सम्पन्न हुने आश्वासन दिए ।

मुलुकमा गणतन्त्र स्थापना भएसँगै राजतन्त्र र त्यसको ऐतिहासिकता जोगाउन सरकारले नारायणहिटी राजदरबारलाई संग्राहलयमा रुपान्तरण गरेको थियो । सरकारले २०६५ फागुन १५ गते दरबार सर्वसाधरणका लागि खुल्ला गरिएको थियो ।